Parlamentario Quincy Girigorie: Stòp di insultá inteligensia di e pueblo.
Parlamentario Quincy Girigorie
Stòp di insultá inteligensia di e pueblo.
Kronika di kaso CPR. Bo ta hür bo kas (Bullenbaai) augustus 2022 ku un hürdó di mal reputashon, p’e traha sèn ku n’e. Bo kemen ku si e traha sèn, bo tambe ta gana sèn.
E ta pagabo 3 luna di hür i traha “manchi di plaka” tur luna ku bo kas.
Òktober 2022 bo ta haña prueba ku e ta un estafadó. Pa kolmo e ta stòp di pagabo fin di òktober tambe.
December 2022 bo ta alargá su kontrato di hür tòg, p’e sigi traha sèn ku bo kas, maske e tin 2 luna sin paga i maske b’a haña un rapport ku ta konfirma ku el a falsifiká dokumento. Pa kolmo bo ta gaña parlamento janüari 2023 ku e hürdó no ta un estafadó i ku e ta pagando bon bon. Dikon???
Ta resulta ku b’a sera un kontrato mas pa limpia bo kas p’e, ku tambe e tin 7 luna sin pagabo.
Jüli 2023 bo ta bai korte, despues ku e tin 8 luna sin pagabo, pone beslag riba su inboedel (kontenido di 1 tanki) pa haña e sèn ku e debebo. Hues ta kondená e estafadó pa pagabo loke e debebo i hues ta bisa ku tanten e tin kos den bo kas, e tin ku sigi pagabo tambe.
Bo tin asina tantu kurashi di pretendé ku sera e dil aki ku estafadó ta “Bon Gobernashon”.
Ban serio! Bon gobernashon ta ora bo ta asina serio (integridat) ku asina bo tin prueba ku ta estafadó, bo ta kibra e kontrakt (manera b’a hasi Jüli 2023”) i buska un hürdó ku SI ta paga. Bo’n ta warda 8 luna lage bende kasi tur e produkto i traha sèn sin pagabo.
Tanten ku bo a sinta ketu, e hürdó estafadó a traha “manchi di plaka” ku bo kas sin pagabo niun depchi i awor abo tin ku bai hasi gastu, bende sobra di su inboedel pa kobra bo sèn.
Esaki nos ta yama falta di seriedat i integridat. “A otro perro con ese hueso”.
