DIA NASHONAL DI TRANSPORTE PÚBLIKO

Willemstad – Djadumingu 20 di ougùstùs 2023 ta Dia Nashonal di Transporte Públiko. Gobièrnu di Kòrsou na 2016 a dekretá e di tres djadumingu di luna di ougùstùs komo Dia Nashonal di Transporte Públiko. Minister Charles Cooper huntu ku Servisio pa Tráfiko i Transporte (UOVV) ta felisitá tur persona ku ta laborá den e sektor di Transporte Públiko ku nan dia, esta djadumingu awor 20 ougùstùs.

Riba e dia aki, ta duna atenshon speshal na Transporte Públiko ku ta entre otro: bùsnan grandi, mediano i chikí, taksi, ‘toerwagen’, i vehíkulonan ku a risibí dispensashon bou di artíkulo 15 di e lei di Transporte Públiko. E aña aki un bes mas lo pone atenshon na e dia ku un santu sakrifisio di misa 9or di mainta na Katedral di Pietermaai.

E meta ta pa den e sektor di transporte públiko tin koperashon mutuo entre e diferente partidonan pa asina logra yega na un sistema di Transporte Públiko efisiente, pagabel i konfiabel.

For di 2020 te ku aña 2023, e sektor di transporte públiko a eksperensiá un par di aña difísil mirando e impakto di e pandemia di COVID-19 riba nos pais. Apesar di esaki, e sektor aki ta rekuperando i ta surpasando tur reto enkontrá.

“Pa her lanta dams, kaha ku wiri mester mara”