RI-ANNE RAFAELA DI KORSOU A BIRA E KAMPEON INDISKUTI DI E KOMPETENSIA DI DAM INTERNASHONAL HUBENIL TENE NA HOOGEVEEN HULANDA!

Durante e periodo di 14 pa 19 di ougùstus último tabatin e konosido kompetensIa di dam “Zomertoernooi Hoogeveen Open 2023” na Hulanda. Komo parti di e “Zomertoernooi Hoogeveen Open 2023” nan a organisá tambe un kompetensia di dam internashonal hubeni lna kua dos hóben di Kòrsou, Ri-Anne Rafaela (13 aña) di Pierre Laufferschool i Patrick Oseana (11 aña) di Franciscus College a partisipá. Mester bisa ku e dos hobennan aki, ku a bai den representashon di “Rais Youth Draught Foundation Curaçao” a duna un presentashon hopi formidabel. Na final di e kompetensia Ri-Anne Rafaela a sali invikto den su pool i a keda koroná tambe komo kampeon di e kompetensia internashonal hubenil. Nos otro partisipante Patrick Oseana na final a klasifiká den empate na promé lugá den su pool. Mirando e situashon ku a surgi, mester a hunga un wega di deskite kontra di otro via di un wega di dam rápido. Akinan Patrick a pèrdè i a bin sali na di tres luga den su pool.

“Nos ta sumamente satisfecho i kontentu ku nan resultado”, señor Harlee Oseana, Presidente di “Rais Youth Draught Foundation Curaçao” a bisa. “E dos hobennan aki, durante un periodo di 4 siman a risibí un treinen intensivo di dam serka señor Zainal Palmans, ku ta un Maestro Internashonal di Dam ku a keda enkargá pa kordina i duna e treinen di 4 siman na nos dos hobennan na Hoogeveen. Danki na intervenshon di señor Frans de Jonge, Presidente di KNDB (Koninklijke Nederlandse Dambond / Federashon di Dam di Hulanda) esaki por a bira posibel. Nos ke gradisí tambe Maduro & Curiel’s Bank N.V., Ministerio di Enseñansa, Siensia, Kultura i Deporte, i tambe na e diferente famianan na Den Haag, Leiden i Emmen ku a duna un kontribushon balioso den hospedage pa por a hasi e proyekto aki posibel”, señor Oseana a bisa na final.

Desaroyo di Dam Hubenil na Kòrsou
Wega di dam ta birando un deporte basta konosí riba nos isla. Apesar di su popularidat, e no ta un deporte ku ta haña sufisiente atenshon bou di nos hubentut. Den su afan pa promové, desaroyá i alabes alsa e nivel di dam serka nos hobennan na Kòrsou, e maestro di dam di Kòrsou señor Raoul Alias a lanta e organisashon “Rais Youth Draught Foundation Curaçao”. Riba propio inisiativa i boluntariamente señor Alias a kuminsa duna lès di dam na diferente skol manera entre otro Kolegio Fatima, San Fransiscus College i Adventschool Bonam. Banda di e lèsnan di dam na skol tambe señor Raoul Alias ta train algun hoben na e sentro di “Rais Youth Draught Foundation Curaçao” ku ta situá na Kaya Kurtisa 2.

Si tin instansha òf persona ku ke kolaborá ku “Rais Youth Draught Foundation Curaçao” por tuma kontakto ku su direktiva na e-mail board@raiskids.com.