Minister Shalten Hato AGRESHON FÍSIKO BOU DI ALUMNONAN DI SKOL

Minister Hato a tuma nota di varios video ku ta sirkulá riba medionan sosial di bringamentu di alumnonan di skol sekundario den sentro di siudat i tambe riba vianan públiko. Esaki ta echonan kastigabel. Konforme di lei e echonan aki ta bou di investigashon aworaki.

Minister Hato a aktivá mes ora i a sinta na mesa ku KPC, OM, UOJZ pa bin ku un plan di akshon. E plan di akshon ta enserá ku lo aktua ku man duru pa garantisá siguridat tantu riba vianan públiko komo den kurá di skol. Proyektonan di Ministerio di Hustisia manera ‘’Sendé, ta konsiente’’ ya ta bayendo skolnan pa konsientisá hóbennan riba diferente tema manere entre otro kon pa dil ku agreshon. Ministerio Públiko konhuntamente ku Ministerio di Hustisia ya a traha un protokòl pa kombatí violensha na skol i/òf bou di alumnonan. Pronto lo firma e protokòl aki huntu ku Ministerio di Enseñansa, Siensia, Kultura i Deporte.

Minister Hato ta urgi tur mayor pa papia ku nan yunan i kaminda tin problema di ‘’bullying’’ aserká skol i si esaki eskalá na agreshon físiko akudi na warda di polis. Den mesun rosea ta hasi un yamada na hóbennan i mayornan ku ta viktima di bringamentu i/òf violensia pa hasi denunsia na polis pa asina por persiguí esnan kulpabel na esaki.