Frakshon di MAN – Boso representante resientemente a entrega kambio di lei pa introdusi “vaderschap verlof”. Esaki ta konta na momento ku un persona bira tata.

Den pasado MAN a entrega “zwangerschap verlof” despues a hasi kambio den esaki di 12 siman pa 14 siman i laga esaki liber pa e mama skohe.

E introdukshon di “vaderschap verlof” ta duna e tata 5 dia pa por kuida i komparti e bunita momento ku su yu.

Pa nos e ròl di tata ta importante den bida di su yu. E importansia di famia pero tambe e ròl komparti entre e mama i tata ta di sumo impotansia.

Den e mundu di awe tantu e mama i tata ta igual. Esaki sigur ora nos enfoká riba emansipashon di e hende muhé i ròl di hende hòmber/tata den un famia i e responsabilidat kompartí.

E eskoho di 5 dia pa e tata, pa nos ta un komienso pa kana yega i duna e tata e lugá real den bida i edukashon di su yu. Estudionan sientifikó ta mustra e importansia di tata den e yu su prome dianan di bida pa su desaroyo pero tambe e proseso di ser tata pa e hende hòmber.

Na e momento aki e tata no tin ningun dia despues di nasementu di su yu.

Tur e peso ta kai riba e mama ku hopi biaha fisikamente i emoshonalmente mester di sosten di su pareha, e tata di su yu.

Aktualmente empleado publíko tin 2 dia pa e tata i sierto entidat priva ku tin CAO kual ta krea areglo pa e tata na momento ku su yu nase.

Partido MAN ta para pa igualdat mas tantu posibel pa e klase trahadó su benefisionan laboral.

Pa e motibu aki den kambio di lei Frakshon di MAN ta hasi pa tur tata haña 5 dia sea den sektor priva òf den sektor publíko.

Den Reino Hulandes nos por mira diferente kambio riba e tema aki, na Hulanda ya esaki ta 2 siman, na Aruba konose 2 dia i ku ta den proseso pa oumentá esaki na 5 dia.

Ku e kambio aki nos ta duna e tata su lugá i duna importansia i rèspèt den bida i e proseso di edukashon di su yu. Banda di esaki e 5 dia lo sirbi komo yudansa na e mama ku henter dia lo mester dediká na kuido di e yu.

Asina aportá na desaroyo di e hende, e famia riba nivel sosial i emoshonal