EMBAHADORA DI INDIA NA DEN HAAG TA BISHITÁ MINISTER CIJNTJE

Willemstad- Resientemente Minister Cijnte a risibí embahadora di India pa Reino Hulandes na Den Haag, Honorabel Reenat Sandhu, den kuadro di un bishita di trabou na Kòrsou. Embahadora Sandhu a bini huntu ku Consul Honorario Manohar Sawilani i un funshonario di konsulado aki na Kòrsou. E kombersashon a tuma lugá den un esfera ameno i a identifiká vários área di negoshi ku por ta faborabel pa empresanan di India ku ta en buska di oportunidatnan nobo den nos hemisferio i lo benefisiá ekonomia di Kòrsou. Mensahe di embahadora tabata “nos ke kolaborá ku Kòrsou”.

India ta e di 5 ekonomia di mas grandi na mundu. E ta tambe e demokrasia di mas grandi i tin un poblashon di 1.4 miar ku un sektor laboral talentoso i ku hopi abilidat. India ta risibí hopi invershon estranhero i e tin un balansa di komersio internashonal di 1 Triyón (1.000.000.000). India tambe ta invertí hopi den otro merkadonan pa asina krese su potensia i su ekonomia i ta ofresé posibilidat pa koperashon tékniko na otro paisnan di desaroyo. Tur esaki ta disponibel pa Kòrsou hasi uso di dje i probechá di e posibilidatnan ku e pais gigante aki tin di ofresé i nos na nan ku nos posishon geográfiko stratégiko, konektividat digital regional importante, serka i mesun timezone ku e merkado di Norte i Sur Amerika. Tin hopi empresa di teknologia di India establesé na Hulanda i ta mirando posibilidat pa ta mas serka di merkadonan stratégiko den nos kontinente.

Minister Cijntje a duna Embahadora Sandhu un bista di desaroyonan na Kòrsou riba tereno di Energia renobabel, Sektor di IT, Servisionan Finansiero, Agrikultura, Industria Kreativo i tambe Wellness. Manufaktura Liviano tambe ta algu ku por ofresé i Minister Cijntje a duna un bista di nos zona franca i kon esaki por fasilitá komersio den region. Minister Cijntje a palabrá ku Embahadora Sandhu ku e lo laga desaroyá un agènda ku e oportunidatnan identifiká durante e kombersashon i lo diskutí nan pronto ku embahadora na momentu ku e Minister lo ta na Hulanda den futuro serkano pa asina kuminsá stimulá e interkambio entre entidatnan di Kòrsou i esnan na India. Embahadora a invitá Minister Cijntje pa bishitá India den futuro i e lo risibí ful koperashon di parti di embahada di India na Den Haag.