Spantenbier edifisio Krus Kòrá Suffisant

 

 E dia grandi a yega pa e selebrashon di e punto mas haltu den konstrukshon di e edifisio nobo di Krus Kòrá Kòrsou na Suffisant. E selebrashon di ‘spantenbier’ pa e edifisio aki ta algu históriko pa Krus Kòrá i pa hinter komunidat di Kòrsou, asina presidente Alfred Palm a bisa na e okashon ei.

Mayoria hende lo ta korda e dia riba kua e edifisio anterior a kima por kompletu, nèt mei mei di pandemia, poniendo un preshon ainda mas grandi riba Krus Kòrá ku na e momentunan ei tabata trahando duru riba paketenan di kuminda i produktonan di limpiesa i higiena pa famianan den nesesidat. Apesar di e kandela feros ku a destruí tur kos boluntarionan di Krus Kòrá Kòrsou a sigui traha pa sirbi komunidat.

 

Despues di e kandela mester a regla asuntunan formal i un tim di e organisashon a kuminsá deliberá tokante di e edifisio aki, asesorá pa sr. Ranis i sr. Matos de Leon. Ámbos a asesorá Krus Kòrá na 2014 den konstrukshon di e edifisio multifunshonal na Barber. A sigui proseso di invitashon na 3 kontratista pa hasi un oferta i a skohe e kontratistanan. Krus Kòrá ta hopi kontentu ku eskoho di Frens Construction, Gewi, i Simpliare komo e kontratistanan prinsipal. E invershon den e edifisio aki ta 2.7 mion florin. Pa e organisashon aki, ku ta dependé di donashon esaki ta un suma hopi grandi.

Drentando fin di aña 2022 direktiva huntu ku reunion general a disidí di kuminsá ku e konstrukshon apesar ku ta falta un montante respetá di Naf 500,000. Ku determinashon i fe nos lo logra. Den mei, ku ta luna di kolekta di Krus Kòrá a hasi apelashon riba komunidat pa yudansa, spesialmente dia 28 di mei último. Na tur ku a yuda den organisashon I ku a kontribuí finansieramente un danki di kurason

 

E joya di e edifisio aki lo bira e kas nobo di nos boluntarionan kaminda ta duna servisio na komunidat di Korsou, i nos islanan ruman. E edifisio aki a keda konstruí ku mira pa e próksimo 30 aña i nos ta spera ku esaki lo keda kumplí. Papiando di 30 aña i den e tempunan ku mundu i nos komunidat ta pasando aden ku lo mi yama e era di “here today” i “gone tomorrow” Krus Kora tei pa komunidat for di 18 di Mei 1931 i lo sigui tei pa hopi tempu mas.

 

Krus Kòrá Kòrsou ta yama danki na tur hende i instansia ku a koperá ku e organisashon den realisashon di e bunita proyekto aki. Un danki di kurason na hinter e famia di Krus Kòrá Kòrsou i nos komunidat. Danki tambe na tur ku a koperá durante di e téletòn. Nos no a yega ainda na e suma nesesario i pesei ketu bai ta keda konta ku sosten di tur ku por duna un kontribushon.

Na e boluntarionan di Krus Kòrá, pabien ku boso kas i sentro di operashon ku pronto lo ta kla.