HONOR NA NOS HÓBEN PELOTERONAN

Invitashon na Pueblo di Kòrsou pa huntu nos duna honor na nos ekipo di Little League, kampion di serie Mundial.

WILLEMSTAD – Gobièrnu di Kòrsou ta invitá pa huntu, nos ban duna honor na nos kampionnan di e serie internashonal i Sub kampionnan di Little League Baseball, riba djaluna, 28 ougùstùs 2023, na Plaza Brion Otrabanda. Nos hóbennan a konkistá e título di kampion Internashonal den kategoria Little League 2023, na Williamsport, Pensylvania representando e región di Karibe. Pa e motibu akí nos ta duna honor na nan pa a pone nòmber di nos dushi Kòrsou bria den hinter mundu.

E programa ta kuminsá na momentu ku nan yega pa 13:49 di atardi for di Estados Unidos. Nan ta keda risibí pa Ministernan di Gabinete Pisas i despues ta sigui un parada ku ta sali den un trailer direkshon Plaza Brion. E trailer ta pasa e ruta di Karnaval kompletu. E aktividat na Plaza Brion ta programá pa kuminsá 17:00 i ta terminá pa 21.00. Durante di e aktividat tin diskurso di representantenan di Gobièrnu, entrega di regalo i animashon musikal di grupo Sablika i ICONS. Den e anekso por tuma nota di e programa.

Gobièrnu di Kòrsou ta hasi un petishon na pueblo kompletu pa sali kas i saludá nos hóbennan riba ruta i huntu duna honor i apresio na nos hóben peloteronan, pa e echo di a pone nòmber di nos dushi Kòrsou resoná na kanalnan di televishon i radio pa mundu kompleto sa ki grandi nos ta.

Di es manera akí, Gobièrnu di Kòrsou huntu ku pueblo ta gradisí nos muchanan pa nan hazaña impagabel.

Nos ta topa na Plaza Brion djaluna, 28 ougùstùs 2023.
—
Sr. Sithree van Heydoorn
Minister di Enseñansa, Siensia, Kultura i Deporte