PUIS X SCHOOL A INSTALA EBOARDS CU NAN A GANA CU E PROYECTO DI EDUTECH

 

Prome Minister Evelyn Wever-Croes:

 

PIUS X SCHOOL A INSTALA EBOARDS CU NAN A GANA CU E PROYECTO DI EDUTECH

“Mi ta spera cu e entusiasmo y envolvimento di e muchanan den klas, na final, lo refleha resultadonan positivo”

ORANJESTAD – Diamars mainta 29 di augustus, Prome Minister Evelyn Wever-Croes hunto cu Presidente di Parlamento Edgard Vrolijk y Parlamentario Hendrik Tevreden a bishita Pius X School y a admira con e docentenan y muchanan ta traha cu e materialnan cu nan a gana cu e proyecto di Edutech. Durante e competencia, Pius X a logra gana un total di 7 eBoard pa 7 di nan klas local. Pa completa 9 klas, a haci un peticion na WEB Aruba NV pa sponsor e otro 2 eBoards cu falta. E peticion aki a wordo aproba, y awe Pius X School tin un eBoard pa cada klas.

 

Prome Minister a indica di ta hopi impresiona pa tur loke cu Pius X School ta bin ta haciendo, no solamente cu e proyecto di Edutech, sino cu nan participacion na casi tur evento di innovacion den enseñansa. E docente y alumnonan ta hopi contento di a ricibi e eBoardsnan aki cu sigur lo haci e lesnan den klas mas facil y mas agradabel. Pa algun docente e adaptacion na e sistema nobo aki a dura un poco mas, pero nan tur ta trahando cu e mesun entusiasmo y meta, cu ta e bienestar di e muchanan.

 

“Mi ta gradici Juffrouw Sheila Tromp, cabesante di Pius X School y tur docente, pa nan trabou y efsuerso pa cu educacion di nos yiunan. Tambe na e mayornan pa sigui encurasha nan yiunan pa studia bon, y na e alumnonan pa nan dedicacion na un miho futuro. Mi ta spera cu e entusiasmo y envolvimento di e muchanan den klas, na final, lo refleha resultadonan positivo,” Prome Minister a expresa.