Tópiko: traspaso kasnan di pueblo
Na: Minister President i Minister di Asuntu nan General
Sr. G. Pisas
Fort Amsterdam # 17
Presente
Cc: Minister di Tráfiko, Transporte i Planifikashon Urbano
Sr. C. Cooper
Berg Arrarrat, perceel C
Presente
Kòrsou, 30 di ougùstùs 2023
Tópiko: traspaso kasnan di pueblo
Apresiabel Promé Minister Pisas,
Resientemente a sali den medionan di komunikashon e notisia ku promé Minister Pisas lo a anunsiá e intenshon pa traspasá e kasnan di pueblo pa un montante simbóliko di fl. 1,-. Esaki ta remarkabel despues ku minister Cooper a kontestá suskrito, den un karta fechá 21 di yüli 2023, ku pa lei e por baha te un máksimo di fl. 3500,- for di e preis di kompra. I ku e ta trahando riba un proposishon di lei pa oumentá e montante aki. Ademas den reunion di parlamento fechá 24 di ougùstùs, sr. Cooper a indiká ku e tambe a tende di e ekspreshonnan di sr. Pisas,den medionan di komunikashon, pero e no por konfirmá, ni desmentí esakinan.
E echo ku tin dos minister di mesun gabinete Pisas ku aparentemente ta duna dos mensahe asina diferente, a trese hopi konfushon serka e kumpradónan di e kasnan aki. Ta komprendibel ku den kuadro di esaki kada un persona ku ta bida den e kasnan i ku kier kumpra esaki ta eksigí klaridat. P’esei suskrito ta pidi Promé Minister pa duna transparensia i un sentido di trankilidat na un i tur.
Den kuadro di esaki e siguiente pregunta:
- Ta kuadra ku Promé Minister Pisas a hasi e promesa ku kasnan di gobièrnu lo keda traspasá pa fl. 1,- ? Promé Minister Pisas lo por duna un aklarashon riba e kontesta?
Danki di antemano,
Ana Maria Pauletta
Miembro di Parlamento, Partido Alternativa Real
