Minister Pisas a deliniá trayekto pa reskatá nos koralnan i pa garantisá ku pueblo tin sufisiente piská den futuro

Minister Pisas a deliniá trayekto pa reskatá nos koralnan i pa garantisá ku pueblo tin sufisiente piská den futuro

Willemstad – Resientemente Minister di Asuntunan General enkargá ku sektor di Agrikultura, Medio Ambiente i Naturalesa señor Gilmar Pisas tabatin un enkuentro importante ku sientífiko marítimo dr. Mark Vermeij. Durante e enkuentronan a elaborá entre otro riba atendementu ku e malesa di koralnan na sierto parti di Kòrsou, maneho pa evitá deterioro di nos koralnan i pa garantisá ku tin sufisiente piská pa pueblo di Kòrsou awor i den futuro i pa mantené e produkto turístiko di buseo. Pa mantené tur esaki ta di sumo importansia pa nos tin un maneho di oséano efektivo ku sosten di tur stakeholder.

For di komienso Minister Pisas a mustra interes pe tópiko importante aki ku hasta minister a bai sambuyá huntu ku dr. Vermeij pa personalmente tuma nota di e malesa di koral ku mester atendé i otro aspektonan marítimo ku ta rekerí atenshon. Tambe minister tabatin vários enkuentro ku diferente stakeholder. Esensial ta ku mester keda mantené nos koralnan i evitá deterioro. Aspekto importante den esaki ta presensia di e piská Gutu (Papegaaivis). Gutu ta un piská importante dor ku e yuda mantené e koralnan sano i konsekuentemente ta aportá pa e playanan keda ku e karakterístika di santu blanku. Último añanan vários playa a disparsé na algun isla pa motibu di mal kondishon di e koralnan i ousensia di e piska Gutu. Nan ta hèrbifero ku ta morde koral i kome lima i saka esaki bèk komo desperdisio den forma di santu blanku. Gutu su manera di kome ta importante pa produkshon i distribushon di santu i ta prevení kresementu di alga ku ta kubri i mata di koral.

Práktikamente tur isla den Karibe ya ta tumando medidanan nesesario pa evitá malesa di koral i di piská pa asina reskatá nan kosta i mantené kalidat di laman. Durante henter e trayekto aki Minister Pisas a keda asistí pa sr. Faisal Dilrosun di Ministerio di GMN kual alabes ta fasilitá kontakto ku e stakeholders i dr. Mark Vermeij. Dr. Mark Vermeij ta un sientífiko afiliá na Carmabi ku a hasi vários investigashon sientífiko marítimo na Kòrsou. E ta alabes Profesor di Ekologia Tropikal Marino na e departamentu di Ekologia di awa dushi i marítimo na Universidat di Amsterdam. Pronto Minister Pisas lo duna mas informashon tokante di e tópiko aki den un rueda di prensa.