INVENTARISASHON DI RET DI ELEKTRISIDAT NA SKOLNAN

Trayekto pa Inventarisá Ret di Elektrisidat i Isolashon di Skol

WILLEMSTAD – Resientemente Ministerio di Enseñansa, Siensia, Kultura i Deporte (ESKD) a reuní ku Aqualectra den kuadro ret di  elekrisidati i isolashon di edifisio di skolnan. A interkambia di idea, riba posibilidatnan pa mitigá e kalor den skolnan, ku Kòrsou ta eksperensiá i tambe eksplorá posibilidat pa yega na solushonnan duradero.

Na aña 2015 ministerio di ESKD a kuminsá ku un trayekto pa pone panelnan solar riba daknan di skol, e skolnan aki ta;

–            Amador Nita vsbo

–            Sint Paules vsbo

–            Juan Pablo Duarte vsbo

–            RK-MTS

–            Goslinga vsbo

–            Sint Jozef vsbo.

Ministerio di ESKD i Aqualectra ta bai sigui traha riba un plan strukturá pa yega na un maneho efisiente i duradero pa por ekipá skolnan ku sistema di ventilashon, pa asina yega na un solushon struktural pa e problema ku nos alumnonan ta eksperensia na skol. Huntu ta bai kuminsá un trayekto di inventarisashon di e ret di koriente na tur skol i tambe e parti di isolashon den e lokalnan. Esaki pa por planea kon ta bai mitigá kalor na e diferente skolnan.

Na momentu ku inventarisá e ret di elektrisidat i e parti di isolashon ta haña datosnan konkreto ku mester ta base pa yega na un solushon duradero. Esaki teniendo kuenta ku un bon ambiente eskolar ta forma parti integral di enseñansa i ta benefisia nos skolnan.

—

sr. Sithree van Heydoorn

Minister di Enseñansa, Siensia, Kultura i Deporte