UN SIMAN YENÁ KU WORKSHOP PA EMPLEADO PÚBLIKO

Gobièrnu den moveshon: Un siman yená ku workshop pa empleado públiko

WILLEMSTAD – Den e siman di 4 pa 8 di sèptèmber mas ku 600 empleado públiko ta partipisando na diferente workshop. E empleadonan por skohe for di diferente tema pa konektá ku otro, haña idea nobo i traha riba nan kondishon físiko i mental. E departamento di maneho di Rekurso Humano (HRO) den e ministerio di Maneho di Gobernashon, Planifikashon i Servisio Públiko (BPD) ta enkargá ku organisashon di esaki pa konsientisá e empleado pa keda den moveshon pa por sirbi e komunidat mihó.

Tin diferente kos positivo ta pasa den e aparato públiko. Pa mustra e desaroyonan ku tin, diferente kolega ta habri e siman akí porta di nan servisio pa asina kompartí nan konosementu ku otro. Vergunningenloket ta duna splikashon tokante e-CuraCase, e sistema nobo pa atendé petishon di pèrmit. Ministerio di Enseñansa tambe tin su portanan habrí pa mustra kon nan ta traha riba digitalisashon di enseñansa. Ministerio di Ekonomia ta kompartí kon ta diversifiká exportashon pa desaroyá enkonomia, i koleganan por hasi un bishita na Sentro di Detenshon i Korekshon Kòrsou pa mira kon un team entusiasmá di empleado di e departamento di resosialisashon ta guia e klientenan pa un trabou den komunidat bèk.

E empleadonan por skohe tambe pa siña di diferente desaroyo nobo manera por ehèmpel “Artificial Intelligence”, “Agile” i kon pa atendé ku komportashon pa guia un trayekto di kambio. Entre otro ta ofresé seshonnan speshal pa hefenan di servisio i empleadonan ku ta traha den finansas i Rekurso Humano. E petishon pa asistí na kada seshon tabata hopi haltu. Den kòrto tempu a yena tur kupo disponibel i e reakshonnan tabata hopi positivo.

Durante hinter siman e empleadonan por traha riba nan kondishon físiko i mental. Por a skohe pa mainta tempran bai fitness na Koredor. Tambe nan ta haña chèns pa na final di dia kana den Otrobanda pa konosé parti di nos kultura òf bai kana den naturalesa. Diferente oradó ta tene seshonnan pa motivá e empleado pa enfrentá kualke reto den kada fase di nan bida. Sea ku ta ‘deal’ ku menopausa òf ora bo pasa den periodo ménos agradabel den bo bida personal.

E ministerio di BPD tin komo meta pa sigui trese programa di edukashon pa e empleado siña, krese i kompartí ku otro. Den e último añanan a brinda diferente programa pa fortifiká e funshon hurídiko i finansiero. Ku e siman di workshop di “Gobièrnu den moveshon” ta kuminsá planta e simia pa duna tur empleado kontinuamente e oportunidat pa invertí den nan mes i sirbi mihó.