Korte ta dikta sentensia provishonal —Ansary Ta Keda Responsabel

Korte ta dikta sentensia provishonal —Ansary Ta Keda Responsabel

Willemstad/Philipsburg – Centrale Bank van Curaçao en Sint Maarten (CBCS) a tuma nota di e
desishon di awe di Korte Komun di Hustisia den apelashon di e kaso Ennia v. Ansary i otronan.

Den su sentensia provishonal di awe, Korte a konfirmá responsabilidat di Ansary i otronan. Korte a
konsiderá ku Ennia su demandanan ta bálido i esei ta duna Ennia derecho di risibí diferente suma
di daño i perhuisio na balor di por lo ménos NAf 250 mion (USD 117 mion, USD 11 mion i NAf 25.8
mion).
Korte a determiná ku, pa por trata e demas demandanan, lo mester laga un eksperto independiente
hasi un investigashon, i ku tur dos partido tin ku presentá informashon adishonal.
E investigashon lo ta partikularmente pa determiná ki balor Mullet Bay tabatin, rasonablemente,
den e añanan en kuestion. Tur dos partido lo tin oportunidat di ekspresá nan punto di bista tokante
e persona ku lo mester nombra komo eksperto independiente.
Ademas CBCS ta referí na e komunikado di prensa ekstenso ku Korte a emití riba e sentensia
provishonal.
E sentensia provishonal akí ta nifiká ku e proseso di demanda no a kaba ainda i ku lo tuma tempu
promé ku Korte determiná e suma definitivo ku Ansary i otronan ta responsabel p’e. Sin embargo,
e suma ei lo ta supstansialmente mas abou ku e suma ku Ennia a demandá i ku Korte a konsedé
den promé instansia.
Tambe, e sentensia provishonal akí ta nifiká ku e proseso legal na Estádos Unídos pa rekonosé e
desishonnan di korte estranhero lo dura mas largu.
Willemstad, sèptèmber 12, 2023
CENTRALE BANK VAN CURACAO EN SINT MAARTEN