Mirando e debakel den Ennia gobièrnu ta kere ainda ku Jaime Saleh por keda Minister di Estado siendo ko-responsabel pa falta di supervishon den Ennia kaminda pensioen di 30 mil hende ta kore peliger?

Minister di Asuntunan General
Señor Gilmar ‘Pik’ Pisas
Fort Amsterdam 17
Presente
Willemstad, 13 sèptèmber 2023
Tópiko: Mirando e debakel den Ennia gobièrnu ta kere ainda ku Jaime Saleh por keda
Minister di Estado siendo ko-responsabel pa falta di supervishon den Ennia
kaminda pensioen di 30 mil hende ta kore peliger?
Referensha PSNPO2023/131
Apresiabel señor Pisas,
Pa medio di e karta akí suskrito, señor Sheldry Osepa, miembro di frakshon di Partido
Nashonal di Pueblo, ke pidi bo atenshon pa lo siguiente.
Ayera, 12 sèptèmber 2023, Korte Komun di Hustisia di Kòrsou, Sint Maarten i di Bonaire, Sint
Eustatius i Saba, a duna un veredikto di 143 pagina tokante Ennia. Den e veredikto
proveshonal (tussenvonnis) korte a menshoná un lista di nòmbernan di komisarionan ku a
risibí masha hopi plaka. Den e lista di nòmber aki, tin nòmber tambe di señor Jaime Saleh.
Korte ta menshoná ku señor Saleh a risibí entre añanan 2008 pa 2018 un suma di Naf.
2.956.557,-. Aunke Ennia mes ta indikando ku Saleh a risibí un suma di Naf. 2.3 mion eksesivo,
korte a indiká di lo kontesta e pregunta aki na momentu ku Mullet Bay na Sint Maarten kaba
di wòrdu balorá.
E desaroyonan rondo di Saleh komo Minister di Estado no ta bunita. Pueblo di Kòrsou ta hopi
desapuntá ku bou di wowo di e komisariadonan aki Ansary a saka sèn for di Ennia i awor ta
menasa pueblo pa pagé. Jaime Saleh ta konosí komo fiskal, despues abogado, presidente di
Korte Komun di Hustisia di Antia i Aruba. Jaime Saleh tabata tambe Gobernado di Antia. For
di aña 2004 Saleh ta Minister di Estado pa Antia i for di aña 2010 Minister di Estado pa Kòrsou.
Pueblo di Kòrsou a brinda Saleh sufisiente oportunidat pa ekselá. Sinembargo e desaroyo
rondo di Ennia ku awor kasi 30.000 penshonado ta kore peliger i ku ta pueblo di Kòrsou lo
hiba vra pa e fayo ku e komisarionan a kometé, ta lanta un gran desgustu i ta hasi e posishon
di Saleh komo Minister di Estado no sostenibel. E ta un bofta den kara di Pueblo di Kòrsou pa
mantené Saleh den un posishon di honor mientras pueblo lo mester bai paga e 1,2 miar ku a
saka for di Ennia.
Siendo ku Saleh ta un Minister di Estado e autoridat di Parlamento basa riba artikulo 29, insiso
2, di Areglo di Estado pa kita konfiansa for di Saleh i obligé pone su funkshon na disponibilidat,
ta limitá. Dor ku ta tarea di gobièrnu pa proponé Minister di Estado, ta gobièrnu tin e tarea
tambe pa sondia ku bou di e surkunstasianan aki ainda lo por mantené Saleh den e funkshon
aki. Mi pèrsona ta di opinion ku Saleh no ta gosado mas di sufisiente konfiansa pa por sigui
ehersé e funkshon aki i sigui duna konseho na Gobernado i gobièrnu ora pais ta den krisis. I
komo parlamentario ku ta kere den e prensipionan dualista, ta mi tarea, aunke e ta un topiko
delikado, pa na nòmber di Pueblo di Kòrsou mustra gobièrnu riba esaki.
Konsiderando tur esaki i hasiendo uso di e derecho di hasi pregunta manera stipulá den
artíkulo 96 di Reglamento di Orden i tambe artíkulo 57 di nos Areglo di Estado, lo mi ke hasi
minister e siguiente preguntanan:
1. Kiko ta opinion di gobièrnu relashoná ku mantené Jaime Saleh komo Minister di
Estado siendo Saleh komo komisariado na Ennia mester a supervisá pa evitá ku a saka
1,2 miar for di den Ennia i awor 30.000 penshonado ta koriendo peliger i tambe awor
ta pueblo di Kòrsou tin ku hiba vra?
2. Gobièrnu tin plan pa retira Jaime Saleh komo Minister di Estado?
3. Den kaso ku e kontesta riba pregunta number 2 ta afirmativo, pa ki tempu e retiru lo
tuma luga?
4. Den kaso ku e kontesta riba pregunta number 2 ta negativo, dikon no?
Gustosamente lo mi ke risibí kontesta riba e preguntanan akí. Den kaso ku e kontesta no ta
satisfaktoria mi pèrsona lo proponé Parlamento pa den un moshon urgi gobièrnu pa despedí
di señor Saleh for di e funkshon aki. Sperando riba un kontesta ku e rapides nesesario, suskrito
ta keda.
Atentamente,
___________
Sheldry Osepa
Miembro di Parlamentu
Partido Nashonal di Pueblo (PNP