“BAN KERE DEN NOS HENDENAN Y DEN ARUBA, PASO NOS POR!”
Prome Minister Evelyn Wever-Croes:
Prome Minister ta felicita e hobennan Arubiano Disjonrick Jacobs y Brainer Lampe
“BAN KERE DEN NOS HENDENAN Y DEN ARUBA, PASO NOS POR!”
ORANJESTAD – Dialuna mainta, na final di conferencia di prensa di Gobierno di Aruba, Prome Minister Evelyn Wever-Croes, a felicita e hobennan Arubiano Disjonrick Jacobs y Brainer Lampe cu a logra completa e 140.6 miya di e IRONMAN competition na Maryland, y a ricibi e “2023 Award Physically Challenged/ Intellectual Disability Open Division”.
Prome Minister a expresa, cu e logro di e dos hobennan aki, ta pone nos realisa, cu den bida nada no tin limite pa logra locual nos kier logra. Disjonrick ta un hoben den rolstoel, cu apesar di cualkier descapacidad, ta pone su mente y curason pa logra haci su soñonan realidad. E logro di e dos hobennan aki, mester sirbi como ehempel, pa inspira cada un di nos, pa kere den nos mes, den nos hendenan, y den nos pais. Mirando riba e situacion actual na pais Aruba, hopi biaha nos como Arubiano ta kere un hende di afo mas lihe cu nos ta kere nos propio hendenan.
“Ami ta kere den Aruba y su hendenan. Tin ta haci bon, tin ta haci malo, y otro ta bin drecha loke a wordo haci malo, pero semper nos como Arubiano ta bin hunto pa interes di nos pais. Aki na Aruba nos tambe por, y nos ta riba e caminda di finansas duradero di nos pais. Desaroyo economico ta sigui positivo. Loke nos por influencia, nos ta influencia, loke no por no por, pero nos ta purba si pa e bienestar y progreso por yega den tur skina di nos pais, cerca tur ciudadano, y pa no laga niun hende atras.
Nos ta sigui na mesa cu Hulanda pa yega na e miho alternativa pa pais Aruba. Si nos no logra baha e interes pa fin di aña, nos lo sigui busca manera pa refinancia, y baha interes riba e otro debenan, pa asina no tin impacto financiero. Nos Gobierno ta trahando hopi duro di dia y anochi pa hopi tempo caba riba e negociacionnan cu Hulanda, y nos lo logra. Importante ta, pa nos kere den nos hendenan y den Aruba paso nos por”, Prome Minister a termina bisando.
