Bishita na skol Prof. Dr. Nelly Winkel den kuadro di mantenshon/drechamentu di e edifisio

WILLEMSTAD – Tin trabounan grandi di mantenshon na e skol prof. dr. Nelly Winkel den e bario di Kwartier. E edifisio di e skol ta riba e lista di e proyekto ‘Mantenshon atrasá di edifisionan di skol’ pa kua Hulanda e pone 30 mion euro disponibel. E trabounan a yega nan ‘punto di mas haltu’.

A kambia e dak riba gran parti di e edifisionan i tambe e overdekte. E presidente di e grupo di trabou ‘Mantenshon atrasá di edifisionan di skol’ por a partisipá ku orguyo ku e trabounan ta kanando dilanti riba skema. Ta spera ku e trabounan ta keda kla na komienso di 2024. E promé aña despues di e trabounan di mantenshon lo usa e edifisio komo asina yamá ‘wisselschool’.

Minister di Enseñansa, Siensia, Kultura i Deporte, Sithree van Heydoorn, tabata presente pa mira e progreso di e trabounan. Sr.Ludwig Alberto, presidente di e grupo di trabou ‘Mantenshon atrasá di edifisionan di skol’ na Stichting Onderhoud Schoolgebouwen (SOS), huntu ku e kontratista enkargá ku e trabounan a duna minister i representantenan di ministerio di ESKD, BZK i invitadonan un rekorido pa mira e progreso.