Empoderando adultonan mayor den e era di konekshon.

Relashoná ku dia di nos grandinan parlamentario Ana Maria Pauletta ta para ketu na uso di teknologia bou di nos adultonan mayor.

 

 

Den un era marká pa desaroyo teknológiko, ta esensial pa nos rekonosé i selebrá e kontribushon di nos adultonan mayor, kende a hunga un papel importante den formashon di nos komunidat. 1 di òktober, ta e dia ku nos ta selebrá nos grandinan  i esaki  ta un bon okashon pa honrá i apresiá e sabiduria, eksperensia, i resilensia di nos poblashon di edat avansá.

Sinembargo, tambe ta un momentu pa para ketu na e papel ku mas i mas teknologia ta hunga den bida di adultonan mayor. Den kuadro di dia di nos hende grandinan, ami komo miembro di parlamento di Kòrsou, ke para ketu na e forma ku nos adultonan mayor ta den kontakto ku teknologia i e importansia pa sera e gap digital pa sigurá nan bienestar i inklushon den nos mundu moderno.

 

Adultonan mayor hopi bia ta eksperensia gap digital  debí na faktornan manera eksposishon limitá na teknologia, miedu di teknologia nobo, i limitashonnan físiko ku por afektá nan kapasidat pa usa diferente aparatonan.

 

Sinembargo, tempu ta kambia. Hopi personanan mayor ta realisá e benefisio di teknologia i ta hasi esfuersonan pa kubrí e gap aki. Nan ta usa telefonnan inteligente (smartphones), tabletanan, i kòmpiuter pa konektá ku famia i amistatnan, haña akseso na informashon, i partisipá na aktividatnan variá via internet.

 

Konekshon sosial via di medionan teknologiko ta yuda redusí sentimentu di isolashon i soledat serka adultonan mayor. Teknologia ta soru pa nan tin akseso na informashon i di e forma aki duna nan e kapasidat pa mantené nan mes informá i envolví. Aparatonan di bisti (p.e. oloshi) i  aplikashonnan di salú a bira hèrmèntnan esensial pa monitoria salu i estado físiko. Esakinan ta yuda promove un estilo di bida mas saludabel. Riba tereno di seguridat tin sistemanan di monitoria na distansia i alertanan di emergensia  ku ta brindá pas mental tantu na adultonan mayor komo na nan famia.

 

Komo representante di pueblo mi ta  konsiderá mi deber pa sigurá ku adultonan mayor tin e sosten nesesario pa ta parti di e mundu digital i desaroyonan teknológiko ku nos mundu konose. Den e kuadro aki mi ta presentá diferente inisiativanan ku por implementa pa kubrí e gap digital entre pa ku nos grandinan:

 

Akseso na teknologia pagabel: Nos mester bogá pa opshonnan di teknologia  pagabel, inkluyendo supsidionan òf donashonnan pa personanan mayor ku entrada limitá pa por kumpra aparatonan i akseso na internet.

 

Programanan di literasia digital finansiá pa gobièrnu, por yudá personanan mayor bira usuarionan sigur di teknologia. E programanan aki mester ta adaptá na nan nesesidatnan i abilidatnan.

 

Ambientenan sigur online: esfuersonan mester wòrdu hasi pa eduká personanan mayor tokante seguridat i privasidat online. Personanan mayor mester sintí nan kómodo i sigur durante nan nabegashon den e mundu digital.

 

Sentronan di teknologia: establesé sentronan di teknologia den sentronan di bario òf fasilidatnan di kuido pa adultonan mayor ku ta brinda sosten na nos grandinan interesá den teknologia.

 

Kolaborashon públiko-priva: kolaborashon entre gobièrnu i kompanianan den sektor privá por yuda yegá na solushonnan inovativo i deskuentonan riba produktonan i servisio di teknologia pa adultonan mayor.

 

Pa finalisá mi ke trese dilanti ku dia di adultonan mayor ta un momentu pa honrá nos grandinan i rekonosé nan kontribushonnan remarkabel na nos komunidat. Miéntras nos  ta selebrá e dia aki, laga nos tambe rekonosé e importansia di teknologia den bida di nos grandinan. Dor di kubrí e gap digital i brindá e rekursonan i sosten nesesario, nos por sigurá ku nos adultonan mayor por sigui prosperá, keda konektá, i disfrutá di e benefishinan di era digital. Komo parti di e solushon mi lo kuminsá pronto ku algun seshon di literasia digital pa adultonan mayor, na diferente lokalidat riba nos isla.

 

Mi ta kere firmemente ku huntu, nos por hasi Dia di Adultonan Mayor no solamente un selebrashon, sino tambe un kompromiso ku bienestar i inklushon di nos poblashon mayor den nos mundu ku ta desaroyá kontinuamente.