PREMIO BOELI VAN LEEUWEN OTORGÁ NA SR. ORLANDO F. CUALES

Gobièrnu di Kòrsou ta otorgá e prestigioso Premio Willem C.J. (Boeli) van Leeuwen na sr. Orlando Cuales pa su aktonan meritorio riba tereno di periodismo

 

WILLEMSTAD – Riba 10 di òktober 2023 Gobièrnu di Kòrsou a otorgá e Premio Willem C.J. (Boeli) van Leeuwen na sr. Orlando Cuales pa su prestashon meritorio, den e ramo di periodismo. E premio a keda entregá pa Minister di Enseñansa, Siensia, Kultura & Deporte sr. Sithree van Heydoorn i pa Vise-Promé Minister sr. Charles Cooper durante di un anochi ameno na Brakkeput Mei-Mei.

 

For di aña 2019, Konseho Kultural Kòrsou tin e enkargo pa presentá un konseho na Gobièrnu di Kòrsou riba e persona òf instansia ku ta meresé e premio. Konseho Kultural Kòrsou a presentá sr. Orlando Cuales komo kandidato pa risibí e premio e aña akí i esaki a keda ratifiká pa Konseho di Minister.

Na aña 2009 Gobièrnu di Kòrsou a instituí e premio Boeli van Leeuwen ku ta keda otorgá kada dos aña na un òf mas persona òf organisashon ku a alkansá prestashon intelektual ekselente riba tereno kultural, hurídiko, gubernamental, sosial òf periodístiko. E prestashon di e ganadó mester ta unu ehemplar, e mester inspirá i habri bista di komunidat riba e tereno konserní pa e aña koriente i mester surpasá frontera di Kòrsou. E aña akí, a toka turno na e kategoria di periodismo.

Sr. Orlando Cuales a traha den periodismo pa kasi mitar di un siglo i a sirbi komo un ehèmpel i a inspirá hopi persona riba tereno di media i spesífikamente den periodismo. Su manera di enfoká riba tópikonan di interés ta sirbi komo ehèmpel. Tambe, el a demostrá originalidat i kreatividat riba e tereno akí – algu ku ta resaltá for di e diferente programanan ku a ser presentá bou di su liderazgo na Z-86 durante transkurso di aña ta ku e programanan ta amplia vishon (maneranan di mira kos) i ta surpasá i transendé fronteranan di nos isla. Z-86 tabata un konsepto konosí riba e otro islanan di Antia Hulandes i ku pa gran parti danki na e kolaborashon ku koresponsalnan riba e diferente islanan. Sr. Orlando Cuales a keda un embahador di periodismo di kalidat haltu tantu na Kòrsou komo den e eksterior.

Bou di presidensia di Konseho Kultural Kòrsou un hurado despues di a hasi su trabou investigativo, a proponé na Gobièrnu pa otorgá e Premio Willem C.J. (Boeli) van Leeuwen na sr. Orlando Cuales, un di nos baluarte importante pa ku periodismo. Gobièrnu ta yama danki na tur e miembronan di Konseho Kultural Kòrsou pa nan tarea di a skohé i konsehá Gobièrnu dor di sostené Gobièrnu den e trayekto akí.

Ekspreshon engeneral i ekspreshon artístiko ta importante pa desaroyo di un hende i konsekuentemente desaroyo di nos komunidat kompleto i espeshalmente atraves di nos medionan di komunikashon ku ta karga un pilar di desaroyo objetivo di nos Pais. Pa e motibu aki gabinete Pisas II ta yama sr. Orlando Cuales i famia masha pabien, boso kontribushon na desaroyo di periodismo na Kòrsou ta eksepshonal.

—
KOMUNIKASHON
Ministerio di Enseñansa, Siensia, Kultura & Deporte

** Riba e potrèt nan athunto por tuma nota di e momentunan ameno i entrega di e premio na Brakkeput Mei-Mei den presensia di Ministernan, Parlementarionan i miembronan di Konseho Kutural Kòrsou.