JCI Dutch Caribbean ta anunsiá su finalista pa Creative Young Entrepreneurs Award
JCI Dutch Caribbean ta anunsiá su finalista pa Creative Young Entrepreneurs Award
Willemstad – JCI Dutch Caribbean ta orguyoso di anunsiá su finalista pa e kompetensia Creative Young Entrepreneurs Awards (CYE). E kompetensia aki, ta selebrá inovadónan vishonario ku pa medio di ideanan kreativo ta trese kambio positivo den nan industria. Creative Young Entrepreneurs Award ta pa empresarionan hoben kla pa demostrá nan kreatividat den nan empresa i alabes haña rekonosementu pa nan kontribushon inovativo den nan industria.
Partisipantenan a risibi diferente workshop pa asina nan ta prepará komo empresario i tambe komo finalista. Workshop ku nan a haña ta entre otro impuesto, komunikashon i kon importante empleado ta den bo negoshi. I un pitching workshop speshal pa desaroyá nan abilidatnan pa presenta nan produkto of servisio dilanti di sosio potensial, invershonista i kliente.
Al final e programa a resultá ku dos finalista pa e kompetensia, esta Shamiro Anita, fundadó di Marketsz i Sueene Ostiana, fundadó di Produktivo. E kompetensia lo tuma luga dia 19 di òktober kaminda nan lo bai presenta nan negoshi dilanti un panelista di jurado. Riba 21 di òktober e ganadó lo wòrdu anunsiá. E ganadó ta gana un biahe pa Suiza kaminda e lo kompetí pa gana un premio kèsh di $10.000,-. Ademas e lo gana un programa esklusivo di coaching.
JCI ta un abreviashon di Junior Chamber International. Riba nos isla nan JCI ta representá pa JCI Dutch Caribbean, kual na su turno tin organisashonnan lokal afiliá na Aruba, Bonaire, Kòrsou i Sint Maarten. Den JCI hende hoben entre 18 pa 40 aña ta desaroyá nan mes pa bira lider hoben emprendedor. “Nos ta kontentu di por organisá e programa di CYE e aña.” Esaki segun Shakira Albertoe, presidente di JCI Dutch Caribbean.
JCI Dutch Caribbean ta gradisí su partnernan OX and Wolf, Aqualectra, Orco Bank i BearingPoint pa yuda hasi programa Creative Young Entrepreneur posibel.
Pa sa mas di Creative Young Entrepreneurs Award i ken ta nos ganadó, bishita nos Instagram @jcidutchcaribbean. Por tuma kontakto ku nos team tambe na cye.jcidc@gmail.com of +5999 6678407.
