Pèrdida di Embaraso i Yu no mas un Tabú
E tema di pèrdida di embaraso durante generashon a keda den un esfera di tabú, esaki pa diferente motibu. Sea pa bèrgwensa, pa tristesa òf simplemente no sa kiko pa bisa.
A yega momento pa nos ban papia habri riba e tópiko aki. Na aña 2021, tabatin 18 kaso di yunan ku a fayesé promé ku nan hasi 1 aña registrá. Segun sifranan di CBS e porsentahe di mortalidat bou di mucha ta di 5.9%. Segun sifra 1 di kada 4 hende muhé ta eksperensia pèrdida di embaraso. E impakto di esaki riba e salú i bienestar di e mama i tata, ta aspektonan ku nos mester tene kuenta kuné komo pais. Esaki ta laga rasgonan sosial-ekonómiko riba e mayornan i komunidat komo total.
Dia internashonal di pèrdida di embaraso i di yu, ta duna nos espasio pa nos para ketu riba e tópiko aki i mas. I komo legisladó nos mester para ketu riba e burakunan den nos leinan. Ana Maria Pauletta ta konsiente ku pa loke ta trata e sektor laboral, sigur tin espasio legislativo pa akomodá mayornan ku pèrdè un yu. Tin muchu tiki tempu ankrá den lei pa mayornan por atendé di un forma responsabel ku e emoshonnan di pèrdè un yu. Ta un aspekto ku mester pone atenshon na dje.
Pa finalisá, e importansia di papia abiertamente tokante e tema di pèrdida di embaraso i di baby ta hopi kla. E ta un paso vital pa krea un komunidat ku ta ofresé sosten emoshonal i sosten legal na e mayornan ku a pasá den e situashon difísil aki. Komo komunidat, nos mester traha huntu pa kambia nos mentalidat i krea un ambiente di kompashon i komprenshon pa esnan ku ta sufri pèrdida durante e milagroso momentu di haña un yu. Ban uní i saka e tópiko aki for di e esferá di tabú.
________________________________________________________________________
Ana Maria Pauletta
