KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

CBCS a siña for di e kaso Girobank N.V. Di 2021 padilanti, a implementá kambio radikal den supervishon

WILLEMSTAD/PHILIPSBURG — Motivá pa e rapòrt riba e kaso Girobank ku Deloitte (Nederland)
a publiká dia 21 di yüli 2023, Centrale Bank van Curaçao en Sint Maarten (CBCS) lo publiká un
informe di Lessons Learned. E rapòrt di Deloitte ta un resúmen di e resultadonan di e
investigashon riba loke a tuma lugá na Girobank N.V. den e periodo di 2013-2019. CBCS a
analisá e konklushonnan di e investigashon, a identifiká loke por siña for di nan i a implementá
e kambio- i medidanan nesesario.
E informe Lessons Learned ta splika e lèsnan mas importante ku CBCS a saka for di e kaso. Por
ehèmpel, na komienso di 2021, CBCS a implementá algun kambio radikal den su estilo di
supervishon. Awor, e supervishon ta mas dirigí i intrusivo. Ku e aserkamentu nobo akí, e
defisiensianan ku un instituto tin por ser koregí rápidamente, pa mas pronto posibel e instituto
bolbe operá na harmonia ku lei i regulashon, di manera ku su klientenan i komunidat en general
lo sinti ménos efekto negativo posibel. Tambe, CBCS a adoptá un aserkamentu proaktivo en bes
di reaktivo. Esei ta nifiká ku awor, na lugá di warda te ora un instituto violá un lei, ta intervení asina
ripará ku e riesgo di un violashon di lei a oumentá. Pa e aserkamentu nobo akí por ta eksitoso, e
normanan di supervishon mester ta aktualisá, riguroso i ankrá den lei i regulashon. Pa logra esei,
CBCS ta implementando un programa di mas aña pa elevá e lei- i regulashonnan di Kòrsou i Sint
Maarten riba tereno di supervishon, pa nan por ta na nivel di e normanan internashonal.
Banda di e kambionan general akí riba tereno di supervishon, e informe ta detayá algun lès spesífiko
relashoná ku e trayekto di benta di akshon, e supervishon aktual, intervenshon, i mantenshon di
regla. Por último, e informe ta menshoná ku tin mester di mas ekspertisio riba tereno di krímen
finansiero, entre otro, pa por hasi investigashon forense.
Motivá pa e rapòrt, CBCS a pidi hurista (penal) eksterno nan opinion tokante si mester hasi mas
denunsia. Konsiderando e denunsianan hasí kaba, e huristanan a konsehá ku no ta nesesario pa
hasi mas denunsia i CBCS a disidí di sigui e konseho akí.
E informe di Lessons Learned kompleto ta disponibel riba wèpsait di CBCS na:
https://www.centralbank.cw/publications/notes-analyses/analyses.
Willemstad, 8 di yüli 2024
CENTRALE BANK VAN CURAÇAO EN SINT MAARTEN

 

639114718427035"
639114718427035"