Promé Minister a reuní ku tur partido enbolbí den e asuntu di penshonado i huerfanonan di refineria isla.

Promé Minister a reuní ku tur partido enbolbí den e asuntu di penshonado i huerfanonan di refineria isla.

 

Willemstad – Promé Minister sr. Gilmar Pisas a reuní ku representantenan di tur e partidonan ku ta enbolbí den e asuntu di penshonado i huerfanonan di Refineria Isla/Pedevesa dia 20 di òktober 2023.

 

Tabatin presente representantenan di parti di e penshonado i huerfanonan, RdK, Refineria Isla/Pedevesa i Sindikato Apri. E representantenan di PWFC no por tabata presente, debí ku nan tabata den eksterior.

 

Despues ku e grupo di penshonadonan a bishitá Fort Amsterdam i trese un karta pa Promé Minister sr. Gilmar Pisas, mesora e kabinèt di Promé Minister sr. Pisas a kuminsá aserká tur esnan ku ta enbolbí, buska i prepará tur e informashonnan ku ta nesesario, pa por aselerá e proseso aki pa pronto e penshonado i huerfanonan por haña e loke ku Refineria Isla/Pedevesa a primintí i duna di konosé ku nan lo hasi e pago aki na esnan konserní.

 

Durante di e reunion a bini hopi informashon balioso dilanti ku ta bai yuda pa aselerá e proseso di pago.

A konstatá si ku ainda no tin un akuerdo ofisial firmá entre Refineria Isla/Pedevesa ku e penshonandonan i tampoko e huerfanonan. Pues tin di bai kordiná esaki tambe ainda.

A konstatá tambe ku tin nesesesidat ainda di algun informashon hopi klave di parti SVB i Inspekshon di Impuesto.

A palabrá ku lo bai pone un reunion mas pronto posibel ku e instansianan konserní pa por yega na e informashonan ku falta ainda.

 

Promé Minister sr. Pisas tin atenshon pa e proseso i su kabinèt lo sigui vigilá i kordiná e proseso aki huntu ku tur esnan ku ta enbolbí, pa por finalisá esaki mas pronto posibel.