GOBIERNO Y FUTURA TA ANUNCIA CONTINUACION DI E PROYECTO EDUTECH FUND

 

 

Prome Minister Evelyn Wever-Croes:

 

Despues di un aña sumamente exitoso,

GOBIERNO Y FUTURA TA ANUNCIA CONTINUACION DI E PROYECTO EDUTECH FUND

Dialuna mainta, hunto cu Minister di Enseñansa y Deporte, Endy Croes, Prome Minister Evelyn Wever-Croes a atende e conferencia di prensa di FUTURA na unda cu a anuncia e continuacion di e proyecto EduTech Fund. Despues di un aña sumamente exitoso caminda 12 scol rond di Aruba a gana pa nan proyecto piloto di innovacion, Gobierno di Aruba a dicidi pa sigui cu e proyecto aki pa un aña mas. Den total, den e prome aña di EduTech, Afl. 415,000 a wordo inverti den e 12 proyectonan aki haciendo esaki hopi exitoso pa e 12 scolnan rond di Aruba cu a gana.

 

Prome Minister, a bishita diferente scol pa conoce e trabounan di innovacion cu cada scol a haci y ta hacienda. E mandatario principal di nos a pais a expresa di a keda hopi impresiona cu loke e scolnan a haci pa gana e pa nan proyecto di innovacion. Gran mayoria di e scolnan ya caba tawata tin otro proyecto di innovacion cu nan a cuminsa cu ne riba nan propio iniciativa y forsa. Y e premionan di EduTech a yuda pa bay na e siguiente nivel di nan proyecto.

 

“Mi tin admiracion y respet enormemente grandi pa tur esnan cu ta traha den enseñansa cu ta yuda nos educa nos muchanan. Y p’esey mes, a traves di mi ministerio di innovacion, nos kier asisti caminda cu por cu proyectonan di EduTech”, Prome Minister a expresa.

 

EduTech Fund ta un iniciativa importante pa stimula innovacion, tecnologia, y interactividad den scolnan di Aruba. Via EduTech Fund, scolnan di Aruba por aplica pa haya ‘grants’, subsidio, pa proyectonan piloto di innovacion cu a wordo traha door di nan mesun maestronan of studiantenan. Alabes, na e manera cu e proyecto ta diseña, eta stimula tambe un pensamento innovativo den e maestro/maestranan y studiantenan cu ta diseña e proyectonan aki.

 

Innovacion den educacion ta crucial pa nos pais su desaroyo y prosperidad. E mundo ta cambia rapidamente, y nos mester sigui den mesun paso cu e desaroyonan tecnologico. Nos studiantenan mester ta prepara pa e mundo di futuro, caminda tecnologia ta hunga un rol critico den tur aspecto di bida. Pa logra esaki, nos mester inverti den tecnologia y innovacion den nos sistema di educacion y prepara nos hobennan cu tur herment posibel pa nan por ta exitoso den futuro. EduTech Fund ta duna e posibilidad pa scolnan, maestronan, y studiante experimenta cu tecnologia y desaroya solucionnan innovativo pa mehora nos educacion.

 

A ricibi como 50 aplicacion den e prome aña di EduTech. Esaki ta un ehempel di e potencial grandi, y necesidad cu nos tin na Aruba pa crea un ambiente innovativo na scol.

 

“Mi ta gradici tur scol cu a aplica na e inicitativa di EduTech, y pa diseña y aplica cu un concepto diferente. Nos di Gobierno ta orguyoso di EduTech como cu ta e propio maestro/maestra nan di cada scol ta diseña e proyectonan, identificando retonan y oportunidadnan cu kisas un ‘outsider’ no lo por. Danki pa kere den innovacion, y pa e esfuerso pa por eleva educacion na Aruba, y e experiencia di e studiante y maestro/maestranan den klas. Danki pa kere cu innovacion ta e yabi pa nos sigui. Mi ta gradici tambe Minister di Enseñasa Endy Croes cu semper ta cla pa permiti nos y yuda den e proyectonan aki, Prome Minister a expresa.

 

E parti mas fuerte di e Proyecto EduTech, segun Prome Minister, no ta ideanan cu Gobierno ta bin cu n’e of duna, e ta ideanan cu ta nace na e scolnan mes entre maestro, alumnonan y mayornan, cu ta esnan cu sa kico tin mester na cada scol. “Esaki ta e forsa di EduTech. Dus por medio di esaki, nos ta anuncia e continuacion di EduTech Fund y nos ta spera ku scolnan sigui probecha di e oportunidad aki”, Prome Minister Evelyn Wever-Croes a termina bisando.

 

Pa mas informacion y pa aplica por bishita e website http://www.edutecharuba.org