Petishon pa dirigí pregunta na Minister di Desaroyo Sosial, Labor i Bienestar: Parlamentario Seferina kier sa ku paga “ Uitzendbureau “  JobFlex  inskribí na Inglatera 1.3 mion ta responsabel  

 

 

 

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 23 di òktober 2023

 

Tópiko: Petishon pa dirigí pregunta na Minister di Desaroyo Sosial, Labor i Bienestar

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Desaroyo Sosial, Labor i Bienestar señora Rutmilda Larmonie-Cecilia

 

Danki pa e koperashon.

 

Atentamente,

 

 

 

 

David Seferina

Parlamentario pa

frakshon di MFK

 

Minister di Desaroyo Sosial, Labor i Bienestar

Señora Rutmilda Larmonie-Cecilia
PRESENTE

Kòrsou,  23 di òktober 2023

Tópiko: Parlamentario Seferina kier sa ku paga “ Uitzendbureau “  JobFlex  inskribí na Inglatera 1.3 mion ta responsabel  

 

Apresiabel sra. Ruthmilda Larmonie-Cecilia,

 

Miembro di parlamento pa frakshon di Movementu Futuro Kòrsou ( MFK) , David Seferina ke pidi bo atenshon pa lo siguiente.

Frakshon di MFK a tuma nota di algun dokumento ku a keda distribui riba e plataforma di komunikashon “facebook”, esakinan ta indiká ku Minister di Desaroyo Sosial, Labor i bienestar sra. Larmonie -Cecilia lo mester a kambia destinashon di 1.3 mion pa por paga “Uitzendbureau’’ JobFlex. For di e dokumentonan aki por a tuma nota ku e meta tras di e pago aki ta pa reforsá e Ministerio di Desaroyo Sosial, Labor i Bienestar ku 40 “Part timers” mirando e retraso grandi ku tin den e ministerio.

E desishon aki ta zona simpátiko i lo aportá sigur ku e retraso ku tin den e ministerio, mirando  ku un grupo grandi di ambtenar a baha ku VVU. Pero na mes momentu ta laga algun pregunta atras, entre otro kon lo sigui despues ku e kontratonan aki terminá. Mas aleu ta importante pa tene kuenta ku e trahadónan no tin niun klase di seguridat di trabou pa nan yega na nan metanan.

E echo ku e “Uitzendbureau’’ aki su “Hoofdkantoor” ta registrá na Inglatera, a lanta basta pregunta den komunidat. Pa suskrito e gastunan mara na 40 “Parttimers’ ta demasiado haltu, esakinan lo por ta mas abou si lo a ofrese nan un funshon permanente òf un “overeenkomst van opdracht ” (OVO).

P’esei pa medio di e karta aki i hasiendo uso di artíkulo 96 di Reglamentu di órden di Parlamento, suskrito kier hasi e siguiente preguntanan na Minister di Desaroyo Sosial, Labor i Bienestar señora Ruthmilda Larmonie Cecilia;

1. Minister ta na altura ku JobFlex ta inskribí na Inglatera?
2. Minister por splika parlamento pa kuantu tempu e kontrato ku JobFlex ta firma?
3. Minister por splika parlamento unda e sèn di belasting ta bai Inglatera òf Curaçao ?
4. Minister por splika parlamento dikon a skohe un “uitzendbureau” ku “Hoofdkantor” na Inglatera i no aki na Curaçao ?
5. Minister ta haña ku e 1.3 mion aki ta demasiado haltu pa 40 “parttimers?

 

 

6. Dikon minister no a duna e trahadó un OVO na luga di duna un “uitzendbureau” un kontrakt ?
7. Minister por splika parlamento kua ta Sali e ministerio mas faborabel. Duna e trahadó un OVO òf kontratá e “uitzendbureau”?
8. Minister por splika parlamento kon e ta mira su ròl komo minister di SOAW ku tin ku evitá abusu laboral i ta stimulá pa traha ku “uitzendbureau”?
9. Minister por splika parlamento ku e 40 “parttimers” nan aki lo bai aselerá e retraso?
10. Minister por splika parlamento dikon no ta tuma trahadó den funshon permanente?
11. Minister por splika parlamento ku tin vakatura vakante pa yena e funshonnan ku ta bashí si òf no? Si ta no, dikon?
12. Minister ta konsiente ku akuerdo di gobernashon ta bisa mester frena uso di ‘uitzendbureau’ den servisionan kaminda en realidat ta rekerí trahadó den funshon permanente?

Rekordando bo persona na e obligashon den nos areglo di estado pa duna miembronan di parlamento tur informashon rekerí i na e obligashon den e protokòl firma entre parlamento i gobièrnu pa duna e informashon aki no mas tarda ku denter di (2) luna, frakshon di MFK ta keda en espera di bo kontesta.

 

 

Atentamente,

 

 

 

 

David Seferina

Miembro di parlamento pa

frakshon di MFK