Dak na playa di Daaibooi ta kla i pa 2024 lo sigui ku “upgrading” di playanan
Dak na playa di Daaibooi ta kla i pa 2024 lo sigui ku “upgrading” di playanan
Willemstad – Trabounan pa drecha i “upgrade” nos playanan ta sigui. Durante e fin di siman ku a pasa Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas tabata na Daaibooi pa personalmente tuma nota di e trabounan ku a tuma lugá na e playa. Awor e dak ku tabata den un situashon deplorabel i tabata forma peliger pa bishitantenan di e playa a keda kla. Den un siguiente fase ta bai renobá e bañonan i pone mosaikonan nobo i drecha e kranchinan.
Ta bon pa splika ku mantenshon na konstrukshonnan na playanan públiko ta kai bou di responsabilidat di gobièrnu i den e kaso aki Ministerio di GMN.
Lo sigui ku algun trabou mas di drecha playanan e aña aki i pa 2024 intenshon ta pa “upgrade” un total di 8 playa mas. Ta trata aki di entre otro Kenepa Grandi, Kenepa Chikí, Sta. Cruz, Lagun, Caracasbaai i Jeremi. Pa e parti di seguridat lo instalá “drijflijnen” na Kenepa Chikí i Sta. Cruz. Den e kuadro aki mester splika ku “drijflijnen” no tei pa mara boto, pero pa separá área di landamentu i trafikashon marítimo. Minister Pisas a indiká ku lo keda informá komunidat di tur avanse den “upgrading” di nos playanan. Riba potrèt 1 drpd: señor Doran di AVB, señores Hooi di Loaded Construction, señor Gabriel di AVB, Minister Pisas i señor Van Dongen di Daaibooi.
