Building Depot a hasi re-apertura di su Drive Thru

Servisio rápido, material di kalidat i preisnan skèrpi:

Building Depot a hasi re-apertura di su Drive Thru

 

 

WILLEMSTAD:- Resientemente Buidling Depot a hasi re-apertura di su Drive Thru. E atardi a bai a kompañá ku un happy hour pa kliente, empleadonan i provedornan. Pa e renobashon aki, Building Depot a hasi un enkuesta entre su klientenan riba loke nan tabata ke a mira den e Drive Thru i kon por a mehora e servisio di akuerdo ku nan nesesidatnan. Roderick Lucia di Building Depot ta komentá, “Nos klientenan ta rei, ta nan por bisa nos di ki manera nos por sirbi nan mihó. A base di nan kontestanan den e enkuesta, nos a traha riba e renobashon.”

 

E kambionan hasí ta netamente pa akomodá e kontratista i provedor ku tur dia di nobo ta bishitá nos. Por ehèmpel, a pone mas bentana – awor tin mas ventilashon, tin un mihó iluminashon, a basha un flur kompletamente nobo di un koló mas klá i ku tin un efekto ‘anti-slip’, ademas e ta muchu mas fásil pa mantené limpi. Henter e Drive Thru a risibí bòrchi nobo; esaki ta hasié awor mas fásil pa señalá material, i p’e kliente identifiká e markanan mas mihó i hasi su kompra mas lihé. E renobashon a inkluí tambe un planifikashon nobo di e rèkinan di material; por ehèmpel awor Palu ta poné horizontal, esaki ta hasi ku e kliente por mira e kalidat di palu mesora, ademas e ta mas fásil pa pone riba kualke trùk.  E kahero(a)nan tambe a risibí un lugá nobo; klientenan por paga mas lihé i sigui mesora ku nan dia.

 

E Drive Thru di Building Depot ta konosí pa su bon servisio, kalidat stabil di material i preisnan skèrpi. E aña aki Building Depot a keda rekonosé pa di dos aña konsekutivo komo e provedor mas barata di material di konstrukshon. “E kliente ta bon sirbí serka nos; esei ta nos mayor satisfakshon i di nan tambe. Nos no tin únikamente bon preis, sino tambe un bon konseho, bon servisio i un kompra rápido. Nos sa ku den e mundu di konstrukshon, ‘tempu’ ta esensial.” asina Roderick Lucia a finalisá. Kontratistanan por yega fásilmente i pidi un oferta detayá i na midí serka e tim di benta di Building Depot, ya ku nan ta presente den e ‘Contractors Corner’. Semper por yuda e kliente pensa, i konseh’é riba e mihó material i kantidat di dje- pa su proyekto ta unu eksitoso.