Promé Minister sr. Gilmar Pisas ta informá ku Dialogo Tripartit Kòrsou Ta reuní RIBA UN BASE KONTINUO
Promé Minister sr. Gilmar Pisas ta informá ku Dialogo Tripartit Kòrsou Ta reuní RIBA UN BASE KONTINUO
Willemstad – Promé Minister sr. Gilmar Pisas ta informá ku e plataforma di Dialogo Tripartit Kòrsou a reuní pa promé biaha dia 21 di aprel 2023 den un konstelashon nobo i ta kontinuá ku e reunionnan kada dos siman.
Dialogo Tripartit Kòrsou ta un plataforma riba base tripartidario kaminda Gobièrnu, Sektor Komersial (Vereniging Bedrijfsleven Curacao: VBC), i Sektor Sindikal (Central General di Trahadonan di Corsow: CGTC, Sentral di Sindikatonan di Kòrsou: SSK i tambe Sentral Solidaridat Sindikal: SSS), ta bini huntu pa trata diferente tópiko ku ta regardá desaroyo di pais.
Promé Minister sr. Pisas ta e presidente di e plataforma aki i e plataforma ta keda asesorá dor di un fasilitadó ku ta dirigí e reunionnan i un sekretario ku ta enkargá ku entre otro e notulonan di kada reunion.
For di Aprel 2023 ora a start ku e reunionnan di e plataforma aki a kubri bastante tópiko di interes aktual manera entre otro restrukturashon di e plataforma, maneho di minimumloon i e asina yamá “flankerend beleid”, Refineria Isla i otro aspektonan di e sektor industrial petrolero, Ennia, Maneho di Edukashon i tambe sektor energétiko pa loke ta trata suministro di awa i koriente.
Den e kuadro aki a risibí tambe otro instansia, profeshonal i gruponan sosial pa duna informashon i tambe partisipá den diskushonnan ku ta keda hiba den e Plataforma.
Pa loke ta trata representashon di kada gremio ta skohe 3 persona fiho pa representá i partisipá na nòmber di kada gremio den e reunionnan.
Basa riba e tópiko ku ta keda tratá den reunionnan di e plataforma ta definí ken ta keda invitá pa bin duna i òf dialogá riba e tópiko en kuestion.
E sistema di votashon, ora ta rekerí esaki, a keda nominá na 1 voto pa kada un di e tres gremionan ku ta forma parti di e plataforma aki.
Ofisialmente e plataforma ta reuní 2 biaha pa luna, riba djabièrnè atardi di 4 ‘or pa 6 ‘or i e gremionan ta trata mas tantu posibel pa yega na konsenso ku otro.
