DI DOS TEMPORADA ‘BAN PAPIA EKONOMIA’: EDISHON KOMBUSTIBEL

Willemstad – Minister di Desaroyo Ekonómiko, Ruisandro Cijntje, ta lansa e di dos temporada di e podcast Ban Papia Ekonomia. E seri aki di Ban Papia Ekonomia ta konsistí di tres programa ku ta trata e tópiko di kombustibel ampliamente. Ku e temporada aki di Ban Papia Ekonomia, Minister Cijntje i tur e stakeholdernan den e grupo di trabou di Kalidat di Kombustibel ta enfoká pa trese mas klaridat i transparensia den e proseso di stipulashon di maneho, kompra di kombustibel, kalkulashon di preis i kontrol di kalidat di kombustibel na Kòrsou. E programa ta pasa djamars 7:15 na TeleCuraçao i despues di notisia anochi na Televishon Direct.

E di dos temporada di Ban Papia Ekonomia ta forma parti di e trayekto di komunikashon ku ta kompañá e proseso di introdukshon di spesifikashonnan nobo di kombustibel na Kòrsou ku a inisiá na sèptèmber último. E episodionan pa loke ta trata e temporada aki lo elaborá entre otro riba e trayekto ku e grupo di Trabou di Kalidat di Kombustibel a kana pa yega na spesifikashonnan nobo di kombustibel. E grupo di trabou ta konsistí di Ministerio di Desaroyo Ekonómiko, Bureau Telecommunicatie en Post (BT&P), Curoil, Curaçao Car Dealer Association (CCDA), Curaçao Heavy Equipment Association (CHEA), Sindikato Transporte Uní (STU) representando transporte públiko: taxi, bùsnan di skol, ets., representantenan di pòmpnan di gasolin (entre otro: Asogas, COPDA i Vanddis) i Ministerio di Salubridat Públiko, Medio Ambiente i Naturalesa (GMN). Durante e programanan lo kombersá tambe tokante e proseso di kompra di kombustibel, kontrol di almasenahe i distribushon di kombustibel i kalkulashon di preis di kombustibel.

Bou di guia di e presentadó Jo-Anne Da Costa Gomez, Minister Ruisandro Cijntje i tur e stakeholdernan ta papia Ekonomia i ta ekstendé un invitashon na henter komunidat pa sigui e temporada aki di e podcast djamars, 7, 14 i 21 di novèmber, 7:15 PM na TeleCuraçao i despues di notisia di anochi na Televishon Direct. Tambe por sintonisá e podcast aki via kanalnan di medionan sosial di Minister Ruisandro Cijntje, Ministerio di Desaroyo Ekonómiko, Extra i Vigilante i tambe e kanal di YouTube di Ministerio di Desaroyo Ekonómiko i Minister Ruisandro Cijntje.

Minister Cijntje ta invitá komunidat pa keda pendiente di otro boletinnan di informashon ku tantu Curoil i BT&P tambe lo bai kompartí den e próksimo periodo aki pa informá tokante e proseso di introdukshon di e spesifikashonnan nobo i tambe mas despues publikashon di resultadonan di tèst di kalidat di kombustibel. Huntu nos ta papia Ekonomia i sigui traha pa brinda i garantisá komunidat kombustibel di kalidat na e mihó preis.