BRIEVENGAT A ROSPONDÉ DEN GRAN FORMA RIBA AQUALECTRA DEN BO BARIO
BRIEVENGAT A ROSPONDÉ DEN GRAN FORMA RIBA AQUALECTRA DEN BO BARIO
Willemstad 6 di Novèmber 2023- Pueblo di Brievengat a gara e oportunidat ku Aqualectra a duna pa hasi bon uso di servisionan den bario na Brievengat ku dos man, disfrutando di e tremendo ambiente ku tabatin. Tur ku a bishitá e evento por a probechá atendé asuntunan ku nan tabatin pendiente na Aqualectra, partisipá na tayernan interesante, disfrutá di weganan ku ta simulá diferente proseso den Aqualectra su produkshon i distribushon, kumpra nan Pagatinu i gana premio. Tur esaki bou di tremendo animashon di DJ Beetz huntu ku MC Monti i Grupo Rítmiko Kayente.
Aqualectra den bo Bario ta un inisiativa di Aqualectra pa ta mas serka di nos komunidat. Na un forma amikal Aqualectra ta trese su servisio mas serka di komunidat. Brievengat tabata e di dos bario ku Aqualectra a bishitá. E intenshon ta pa sigui bishitá mas bario durante di e próksimo lunanan. Esnan ku ta deseá por pasa pa por ehèmpel regla instalashon nobo, atendé mudansa òf sera areglo di pago. Por partisipá tambe na tayernan tokante di produkshon i distribushon di awa i koriente, siña kon pa lesa resibu di Aqualectra i tambe haña tep pa spar riba e kuenta di awa i koriente. Loke ta hala atenshon di hopi hende ta e weganan ku ta brinda chèns di gana premio unabes ku partisipá. Hopi a hasi uso di oportunidat tambe pa paga nan resibunan na Pagafasil, tambe ku chèns di gana premio.
Sra. Neysa Isenia, CFO di Aqualectra a bisa “Nos ta kontentu di e forma ku komunidat ta brasando Aqualectra den bo Bario. Esaki ta forma parti integral di nos esfuerso pa trese nos servisio mas serka di pueblo. Banda di esaki, grandi i chiki por partisipá na aktividatnan edukashonal ku nos tin pa sera konosi ku tur loke nos koleganan ta hasi tur dia di nobo pa perkurá pa un i tur su awa i elektrisidat. Pronto nos ta anunsiá e siguiente bario kaminda nos lo t’ei atrobe huntu ku tur nos koleganan kende ta entusiasmá pa sirbi nos klientenan na Aqualectra den bo Bario.”
