A realisá UN konsulta tékniko KU OUTORIDATNAN DI VENEZUELA RELASHONÁ KU AKTONAN ILEGAL KU A TUMA LUGÁ KU UN BARKu Venezolano NA KÒRSOU

A realisá UN konsulta tékniko KU OUTORIDATNAN DI VENEZUELA RELASHONÁ KU AKTONAN ILEGAL KU A TUMA LUGÁ KU UN BARKu Venezolano NA KÒRSOU

 

Willemstad – Relashoná ku un insidente kaminda a konstatá diferente kos ilegal riba un barku for di Venezuela resientemente, outoridatnan di Kòrsou a tene un reunion tékniko ku e outoridatnan di Venezuela dia 23 di novèmber 2023.

 

Dia 15 di novèmber último a yega un barku for di Venezuela den kual a bin konstatá ku tabatin arma, munishon, droga i tambe diferente produkto ku no tabata registrá riba e lista sanitario ku tin di keda entregá i tambe algun berdura ku no tabata apto pa konsumo humano.

 

Durante di e reunion aki a informá e outoridatnan konserní di e loke a tuma lugá ku e barku en kuestion i a pone na konosementu di e outoridatnan Venezolano ku di parti di Gobièrnu di Kòrsou nos ke mantené un bon laso di komersio, familiar, kultural i amistoso ku nos bisiña Venezuela, pero ku nos lo no bai tolerá, pèrmití i tampoko akseptá niun tipo di e insidentenan aki mas.

Nos intenshonnan ta pa tene frontera habrí, pero hasiendo e kontròlnan nesesario di parti kada pais, pa asina nos por salvaguardiá e salu i bienestar di e komunidatnan di ambos pais.

 

Tambe a informá e outoridatnan di Venezuela ku nos ta spera di por konta ku e kòntròl severo ku tin di tuma lugá for di Venezuela promé ku sea un barkito òf un barku sali for di Venezuela.

A indiká ku di parti di Kòrsou tur nos outoridatnan lo ta atento i lo aktuá konforme di nos leinan, regla i instrukshonnan.

 

E reunión a kana den un bon esfera.