PARTIDO MEP TA RECORDA 37 AÑA DI FAYECIMENTO DI NOS GRAN LIBERTADOR BETICO CROES

Partido MEP:

 

PARTIDO MEP TA RECORDA 37 AÑA DI FAYECIMENTO DI NOS GRAN LIBERTADOR BETICO CROES

“Ta na nos pa continua cu su legado y lucha pa bienestar di nos pueblo”

 

Diadomingo 26 di November, Partido MEP a recorda e gran Arubiano, estadista y Libertador señor Gilberto Françios ‘Betico’ Croes na ocacion di su 37 aña di fayecimento. Famianan, amigonan y e gran famia di MEP y sostenedornan fiel di e ideal, vision y determinacion di Betico Croes, a bin hunto diadomingo atardi pa un ofrenda floral na graf di Betico Croes sigui pa un Santo Sacrificio di Misa na Iglesia Inmaculada Concepcion na Santa Cruz.

 

Durante henter su carera politico Betico Croes a hiba un lucha tenaz pa saca Aruba for di e constelacion Antiyano y su ideal di mas grandi tabata di mira e pueblo Arubano dirigi su propio destino. El’a sa di logra realisa e deseo di pueblo di Aruba a traves di un UNION fuerte cu el’a sa di crea den pueblo. Su amor, dedicacion y bida pa su pueblo, a haci’e digno di wordo yama Libertador di nos pueblo.

Awe, Betico ta e politico cu mas ta inspira otro politiconan. E ehempel cu tur lider kier sigui. Su palabranan legendario “Si un dia mi cay na caminda, gara e bandera y sigui cu e lucha”, ta inspira nos Partido pa sigui traha pa Aruba.

Lider di MEP, den nomber di Partido MEP ta gradici tur esnan cu a acudi na e recordatorio aki. Un fecha cu lo keda marca den generacionnan nos dilanti. “Betico a logra hopi pa Aruba den un bida relativamente cortico. Awor ta na nos pa continua cu su legado y lucha pa bienestar di nos pueblo”, Lider di MEP a expresa.