APERTURA OFISHAL DI KUSHINA NOBO NA SDKK

Ayera den presensia di Minister Hato, miembronan di parlamento, tim di maneho di Ministerio di Hustisia a tuma lugá apertura ofishal di e kushina renobá di SDKK – Sentro di Detenshon i Korekshon Kòrsou. Entrante promé di yanuari 2024 tur kuminda pa e klientenan di SDKK lo wòrdu prepará den e kushina nobo.

Den kuadro di esaki Minister Hato a hasi posibel pa SDKK tuma algun kòki den servisio pa por garantisá kumindanan di bon kalidat pa e klientenan di e sentro. Tambe e kushina aki lo ser uzá pa e klientenan ku pronto lo inisiá trayekto(nan) di estudio den kuadro di resosialisashon den e sentro di detenshon.

A probechá di e okashon aki tambe pa duna un demonstrashon di e nèt anti-drone ku a ser instalá resientemente i tambe e scanner nobo pa scan produktonan ku ta drenta e sentro di detenshon.