Autoridatnan ta encontra curpa sin bida panort di Aruba
Awe marduga Wardacosta a haya un notificacion di Cuerpo Policial Aruba cu personanan indocumenta a logra subi tera den area di Vader Piet. E dos personanan cu a duna e declaracion na un persona local, a indica cu nan a bini cu un lancha, pero esaki lo mester a bolter riba lama. Mesora Wardacosta a saca unidat di tera pa bai tira un bista den e area. Na yegada na e area panort di Aruba e agentenan di Wardacosta a detecta dos curpa sin bida den lama.
Cuerpo Policial di Aruba a dirigi nan helicopter y Wardacosta a dirigi su patruyanan di tera pa sigi cu e busceda pa mira si ta encontra mas persona. Durante e busceda andando a encontra un curpa mas sin bida. E caso ta sigi na e momentunan aki.
Update den e caso
Awor anochi e helicopter di Wardacosta a saca un curpa sin bida mas for di lama na parti nort di Aruba den e caso aki ariba menciona. En total a haya te aworaki 3 curpa sin bida den lama. Esaki ta e caso caminda un lancha lo a bolter awe marduga den area di Vader Piet.
