NEGOSASHONNAN TA ANDANDO KU SR. ADVOCAAT PA E BIRA E SIGUIENTE ENTRENADÓ DI KÒRSOU SU SELEKSHON NASHONAL!
NEGOSASHONNAN TA ANDANDO KU SR. ADVOCAAT PA E BIRA E SIGUIENTE ENTRENADÓ DI KÒRSOU SU SELEKSHON NASHONAL!
Entrante awe, 3 di yanüari 2024, sr. Dean Gorré lo no ta e entrenadó di e selekshon nashonal maskulino di Kòrsou. Esaki konforme e palabrashonnan ku a yega na dje for di luna di sèptèmber 2023, kaminda a pidi sr. Gorré pa fungi komo entrenadó interino di nos selekshon maskulino te ku luna di dezèmber 2023. Sr. Gorré lo sigui funshoná komo entrenadó di e selekshon femenino senior i komo ‘Technical & Development Director’ hubenil.
Aktualmente Federashon Futbòl Kòrsou ta den negosashon ku sr. Dick Advocaat su tim p’asina e bira e siguiente entrenadó di e selekshon nashonal maskulino di Kòrsou. FFK ke finalisá e negosashonnan aki pa luna di yanüari 2024, p’asina e preparashonnan di nos selekshon nashonal maskulino por sigui pa e próksimo partidonan ku lo tuma lugá den luna di mart 2024.
FFK ta gradisí sr. Gorré pa e tremendo trabou ku el a bin ta ehersé durante e último tres lunanan ku selekshon maskulino di Kòrsou i ta keda hopi gradesido ku sr. Gorré lo keda forma parti di e famia di futbòl di Kòrsou.
3 di yanüari 2024

