Women’s Steering Committee Curaçao i klupnan afiliá a bin huntu na un Santu Sakrifisio di Misa

Women’s Steering Committee Curaçao i klupnan afiliá a bin huntu na un Santu Sakrifisio di Misa

 

WILLEMSTAD – Direktiva di Women’s Steering Committee Curaçao (WSCC), huntu ku representantenan afiliá na WSCC, a bin huntu pa selebrashon di un Santu Sakrifisio di Misa na Santa Maria pa yama Kreador danki pa un aña nobo den preparashon pa e di 50 aniversario di e organisashon. E Santu sakrifisio di Misa tabata liderá pa Pastor Curtis Meris,kende ta Tata Spiritual di Women’s Steering Committee Curaçao.

 

Na inisio di e aña nobo, presidente di WSCC, sra. Mirieta Lourens, na nòmber di direktiva e organisashonnan a kompartí algun mensahe i tira lus riba puntonan ku den punto di bista di direktiva di WSCC, ta rekerí atenshon. “Nos ta bin di un aña di hopi turbulensia i reto, tantu na nivel mundial, komo na nos isla mes. Situashonnan di hamber, pobresa, violensia, desaster natural i guera ku a eksigí bida di hopi hende i trese hopi fèrdrit den famia. Den e aña nobo ku nos a drenta e puntonan aki lo sigui pidi atenshon,” sra. Lourens a enfatisá.”

 

“Tin hopi kos ku no ta den nos man, i ku nos no por influensiá, pero e aspektonan loke ku nos por duna atenshon na dje i purba mehorá, nos mester hasi esaki. No solamente ku palabra pero mas tantu ku akshon,” e presidente di WSCC a sigui bisa. “Alabes nos mester uni mas den orashon i alimentá nos bida spiritual pa yega mas serka di nos Kreador.”

 

“Riba ruta pa selebrá e di 50 aniversario di nos organisashon, por keda konta ku nos lo sigui organisá eventonan informativo i di interkambio di idea. Tambe por konta ku nos lo sigui empoderá union i stabilidat den famia ku ta e pieda angular  riba kua nos mester sigui edifiká nos pais. Banda di esaki mi ke bisa ku si nos tin kosnan di pasado ku ta pone ku nos relashon ku otro ya no ta dje bon ei, laga nos pidi otro despensá i rekonsiliá ku sinseridat pa asina nos por dirigí nos enfoke riba desaroyo.  No solamente komo individuo, pero komo kolektividat. Mi sa ku nos por, basta nos ke. Ban traha huntu pa un meta komun. Un aña próspero pa un i tur.”