Resumen breve di klima pa aña 2023

Willemstad – Aña 2023 por wòrdu konsiderá komo un aña ku tabata kalor, miéntras un kantidat normal di awa a kai.

 

Aña 2023 a kuminsá relativamente fresku ku temperaturanan un tiki ménos ku  normal. No opstante esaki, durante e di dos mitar di aña, temperatura a oumentá te mas normal. Na den fin di ougùstùs i den luna di sèptèmber a eksperensiá diferente ola di kalor ku temperatura nan alkansando serka di 35 pa i 36 grado Sèliùs kompañá pa tiki bientu. E kombinashon aki a resultá den un situashon sumamente inkonfortabel i peligroso pa esnan mas vulnerabel den nos komunidat. Riba e fecha, 28 di ougùstùs a registrá e máksimo temperatura di aña, kual ta 37.0 grado na Aeropuerto Hato. Di otro un banda, e temperaturanan 27 i 28 grado den anochi i mardugá, no a sòru pa trese e fresku deseá. Mas ainda, e averahe di temperatura mínimo di 28,3 pa sèptèmber ta wòrdu konsiderá komo un ekstremo. Meskos ta keda konsiderá, e averahe di temperatura mínimo di aña 2023, ku ta 0.4 grado riba e normal. Tambe luna di òktober, e temperaturanan a keda relativamente mas kalor ku normal.

Pa loke ta trata áwaseru den e promé mitar di aña 2023, e kantidat registrá  tabata 30% ménos ku di normal. Den sèptèmber a keda registrá 0.2 mm di áwaseru. Último biaha ku tiki áwaseru a kai durante e luna aki, tabata na aña 1960. Luna di Òktober a registrá alrededor di 230 mm, dor eventonan di mal tempu i áwaseru fuerte ku kousa a molèster na diferente parti na Kòrsou. Ku e tiki áwaseru den e promé parti di aña i mas tantu den e di dos, tòg a logra na alkansá e total di averahe den un situashon normal pa aña.