TUR KOS TA KLA PA INSKRIPSHON PA FESTIVAL DI TUMBA 2024 KU DIFERENTE AKTIVIDAT ATRAKTIVO
TUR KOS TA KLA PA INSKRIPSHON PA FESTIVAL DI TUMBA 2024 KU DIFERENTE AKTIVIDAT ATRAKTIVO
WILLEMSTAD-Djadumingu awor 14 di yanüari 2024 ta dia di inskripshon di tumba. Un dia sumamente interesante i importante kaminda aparte di e inskripshon komposistor, kantante, areglista i bandanan ta risibí promoshonnan grátis na e medionan di komunikashon ku ta presente. Un dia estilo ban topa kaminda tur ku tei ta pasa un ratu ameno. Tur persona ku ta na Festival Center djadumingu awor por kumpra nan karchi entre 15.00 or pa 17.00 or i kumprando esaki bo ta bin mesora na remarke pa por gana premionan atraktivo. E kondishon ta si ku na momentu ku tei pasa pa e rifa di e premionan bo mester ta presente den Curaçao Festival Center. Lo bai tin premio kaminda bo por gana karchi di entrada pa e festival i tambe premio pa kortesia di Jet Air. E number di karchi ku bo kumpra djadumingu awor den Festival Center lo ta bo number di suerte ku lo bai den e tómbola na momentu ku ta bai tene e rifa. E rifa ta tuma luga 17.00 or.
Aki ta sigui e programashon di djadumingu awor na Curacao Festival Center.
Programa dia di inskripshon 2024
Inskripshon ta di 14.00 or pa 18.00 or
14.00 or Apertura
14.02 or Palabra di Presidente di AMAK sr. Manfred Gomes
14.05 or Palabra di Presidente di Hurado Francis De Lannoy
14.07 or Palabra di Minister di OWCS Sythree van Heydoorn
14.10 or pa 18.10 or Inskripshon Festival di Tumba 2024
18.10 or Klousura ofisial di inskripshon
18.11 or 18.50 or Kòntròl di tur informashon di inskripshon
19.00 or Sakamentu di sekuensia di e anochinan. Presente Presidente AMAK, Presidente di Hurado i Minister van Heydoorn
20.00 or pa 21.00 or Músika bibu
Karchinan pa Festival di tumba ya ta na benta
Den kaso ku bo no por ta presente den Festival Center djadumingu awor tin otro puntonan di benta ku bo por kumpra bo karchi di entrada. Esakinan ya ta optenibel na diferente establesimentu.
- pa sekshon general e preis ta 90,– (ink OB) pa tur 4 anochi
- pa Red Carpet e preis ta ANG. 345,– (ink OB) pa tur 4 anochi.
Tuma nota ku:
- NO ta bende karchi separá/lòs.
- Tur karchi tin un “QR code”, pues LO NO ta posibel pa dos persona drenta ku mesun number di karchi.
Karchinan ta optenibel na:
- Tur filial di Sentronan di Pago di Tu y Yo
- 24 uur uit de muur
- Ticketpoint na Zeelandia
- Around the clock na Rio Canario
- Fun Miles (por kambia punto pa karchi)
- Kompania òf instansianan ku kier kumpra un kantidat por app e numbernan +5999-6962084 òf +5999-5125853
