Bos di Hubentut ta lansa kampaña pa

prevenshon di abusu titulá ‘Ku Ki Derechi’

 

 

Willemstad, 18 yanüari 2024 – Durante un rueda di prensa, Fundashon Bos di Hubentut a lansa su kampaña ‘Ku Ki Derechi’ pa konsientisashon i prevenshon di abusu. Meta di e kampaña ta pa konsientisá nos pueblo pa nan por rekonosé abusu en general i prinsipalmente abusu seksual, p’asina por prevení esakinan. Ta huntu nos mester kuida i protehá nos mucha- i hóbennan i sòru pa nan derechinan keda respetá.

 

Minister di Desaroyo Sosial, Labor i Bienestar, Sra. Ruthmilda Larmonie-Cecilia, tambe tabata presente na e rueda di prensa i a ekspresá su sosten pa e kampaña i a hasi un apelashon na komunidat pa nos ban hasi kaso di e kampaña i yuda otro pa nos yega na un komunidat sin violensia i sin abusu.

 

Fundashon Bos di Hubentut a skohe pa lansa e kampaña ‘Ku Ki Derechi’ promé ku e temporada vulnerabel di karnaval, den kual por tin uso eksesivo di droga i alkohòl ku por hiba na diferente tipo di abusu. Bos di Hubentut ke pa nos komunidat para ketu for di awor na e peligernan ku por tin, pa por prevení esakinan mas tantu posibel.

 

‘Ku Ki Derechi’ ta un kampaña ku den pasado a risibí hopi akohida i a hasi un impakto den nos komunidat. Aworakí Bos di Hubentut a elaborá e kampaña i krea propagandanan nobo na 4 diferente idioma pa por alkansá nos pueblo multilingual via televishon, radio, korant i media sosial. E kampaña ta sirbi interes general i ta benefisiá tur gremio den nos komunidat i en espesial nos muchanan. Durante henter aña Bos di Hubentut lo sigui ku e kampaña i lo organisá entre otro charlanan den bario, workshop pa mayornan i un dokumental edukativo pa esnan ku ta traha ku mucha- i hóbennan.

 

Komunidat por keda pendiente tambe pa luna di aprel ku a keda designá komo ‘Blue Month’ kontra abusu di mucha. Den e luna ei Bos di Hubentut lo sigui pone atenshon riba prevenshon di abusu pa medio di diferente aktividat interaktivo pa tur edat, inkluso un mini-konferensia pa hóbennan.

 

Manera kustumbrá, den luna di novèmber Bos di Hubentut lo organisá tambe aktividatnan pa tur hende por pone atenshon na e derechinan di mucha riba Dia Internashonal di Derechi di Mucha (20 di novèmber). Bos di Hubentut lo sigui traha duru na bienestar di nos komunidat, konsientisando mucha, hóben, adulto i profeshonalnan tokante peligernan ku por tin i duna edukashon pa por prevení esakinan.

 

Bos di Hubentut ke gradisí tur persona òf instansia ku a aportá na e kampaña ‘Ku Ki Derechi’ i ta spera di por konta ku sosten di tur siudadano den nos komunidat, pasobra ta solamente huntu nos por konsientisá nos pueblo i trese un kambio. Mihó nos prevení ku lamentá!

 

Pa mas informashon, òf si ke hasi un donashon, por subi e wèpsait www.bosdihubentut.com òf tuma kontakto durante ora di ofisina na telefòn 462-2442, 461-8103 òf via WhatsApp na 524-5362.