ENTREGA DI VERZAMELLOONSTAAT PROME KU 1 DI MART 2024 SINO MULTA DI 5.000 FLORIN
Último añanan Servisio di Impuesto ta traha duru na mehoramentu di servisio na su klientenan. Den e kuadro aki, ta repasá prosesonan atministrativo i kaminda ta posibel ta hasi uso di ICT pa evitá fayonan i pa aselerá ehekushon di trabounan. Pa sigurá ku e aña aki por paga restitushon di impuesto riba entrada mas lihé, Servisio di Impuesto ta pasa pa yenamentu previo parsial di deklarashonnan di impuesto riba entrada 2023.
Den e deklarashon di impuesto riba entrada, lo yena adelantá entre otro, e datonan di salario ku ta riba e verzamelloonstaatnan ku dunadónan di trabou a entregá. Servisio di Impuesto a konstatá ku su klientenan ta hasi fayonan frekuentemente ora nan ta kopia datonan di salario for di e ‘loonbelastingkaart’. Esaki ta kousa ku tin interupshon den e proseso di tratamentu di deklarashonnan di impuesto riba entrada i esaki ta kousa retraso den e pago di restitushon. Dor di yena e datonan di salario ku Servisio di Impuesto ta disponé via di verzamelloonstaatnan di antemano, por prevení fayonan manera esaki i klientenan por risibí nan restitushon mas lihé.
Pa por yena e datonan di salario di antemano ta nesesario pa dunadónan di trabou entregá nan verzamelloonstaat na tempu e aña akí. Apesar ku e término legal pa entregá verzamelloonstaat ta stipulá pa 1 di febrüari 2024, Servisio di Impuesto ta duna dunadónan di trabou te 1 di mart pa kumpli ku e obligashon aki. Pa 1 di aprel 2024, Servisio di Impuesto lo ofresé e deklarashon di entrada ku ta yená di antemano na su klientenan, loke lo hasi e proseso di deklarashon di entrada mas fásil. Naturalmente, e kliente mester kontrolá e datonan ku ta yená di antemano i kaminda ta nesesario, komplementá òf koregí esakinan. E kliente ta keda responsabel pa korekshon di e kontenido di e deklarashon.
Pa hasi e desaroyo importante aki posibel, Servisio di Impuesto ta hasi un yamada na dunadónan di trabou pa pone nan atministrashon di salario na òrdu inmediatamente i den esaki pa tene kuenta spesialmente ku numbernan di crib ku ta falta. Sin number di crib di tur empleado, no por entregá e verzamelloonstaat. Si no entregá e verzamelloonstaat na tempu, lo pasa rápido pa imponé multa pa dunadónan di trabou. E multa pa no entregá verzamelloonstaat na tempu ta 5.000 florin. Empleadonan ku ainda no a entregá nan number di crib na nan dunadó di trabou por haña esaki via korespondensia di Servisio di Impuesto. Tambe tin un formulario disponibel riba www.belastingdienst.cw pa pidi e number di crib.