G&GZ ta hasi investigashon den kaso di keho risibí relashoná ku produktonan ku a vense  

G&GZ ta hasi investigashon den kaso di keho risibí relashoná ku produktonan ku a vense

Willemstad – GMN a risibí resientemente un keho di un konsumidó kende a informá di un hende ku a bira malu despues a kushiná i kome sierto produkto di kual aparentemente e fecha a vense. Por nota tambe informashon (nan) den media sosial tokante e insidente aki. E persona ta sigui mas aleu i deklará ku e la kumpra e produkto na Centrum Supermarkt Mahaai.

 

Manera ta kustumber e departamentu di THZ a hasi un investigashon pa determiná kiko a pasa. Den e kaso aki a konstatá ku bèrdat tabata tin produktonan di Hotdog ku fecha ku a vense, pero esakinan ya a keda apartá pa wòrdu destruí. E investigashon no a terminá i ta wardando riba konklushon di e investigashon pa sa por ehèmpel ta kiko eksaktamente por a kondusí na bira malu di e persona. Tèstnan di laboratorio via di dòkter di kas lo por revelá e kousa.

 

Mas aleu THZ a hasi un kòntròl ekstenso riba tur produktonan di alto riesgo su fecha di vensementu den e supermerkado. Pa klaridat por ehèmpel ariña, suku i salu no ta produkto di alto riesgo. Produktonan di karni, lechi i piská i marisko ta di alto riesgo.

 

Na final di e chekeo den Centrum Mahaai no a konstatá e dia en kuestion produktonan ku nan fecha a vense. Públiko por yama semper bai na tel 432 2867 i informá unda tin produktonan pa bende di kual nan fecha a vense.

 

GMN ta enfatisá e importansia di kalidat i seguridat di alimento i bienestar di e konsumidó.

 

 

23 di Yanüari 2023

 

dr. Melissa Arias, Hoofd G&GZ