Willemstad, 7 di febrüari 2024

Gerensia di Curoil a tuma nota di publikashonnan riba retnan sosial indikando ku Curoil lo tin un debe di ANG 88 mion na Belasting. E informashon aki ta saká for di konteksto. Curoil ta un kompania ku semper a kumpli kabalmente ku tur su obligashonnan pa ku Belastingdienst. Belasting riba kombustibel ta keda inkluí den e preis ku e konsumidó ta paga na pòmp. Curoil su ròl ta simplemente pa kobra i transferí/’draag af’ esaki pa Gobièrnu.

Na 2018 despues ku Refineria a hañ’e den problema, Curoil mester a kuminsá importá tur produkto pa evitá un stock out di produkto. Promé ku 2018, Curoil tabata importá solamente Low Sulfer Diesel, ya ku refineria no tabata produsí esaki. A reglá ku Gobièrnu pa no inkluí impuesto di importashon den e preis di diesel. Despues ku Curoil a kuminsá importá e otro produktonan (entre otro gasolin i kerozin), Curoil a aserká Douane i tambe Gobièrnu di e tempu ei, pa atendé ku impuesto di importashon riba e otro produktonan, ya ku aplikashon di esaki riba produktonan pa merkado lokal, lo a nifiká un subida di preis konsiderabel.

Gobièrnu di Kòrsou mester hasi e adaptashonnan nesesario pa por eksonerá impuesto riba importashon di produkto petrolero. Esaki no a keda reglá formalmente ainda, i den espera di un desishon final e impuestonan aki nunka a keda inkluí den e kalkulashon di preis di BTP. Esaki ta keda indiká tur luna den e dekreto di kambio di preis ku Gobièrnu di Kòrsou ta publiká. Konsekuentemente nunka e konsumidó a paga e impuesto aki, dus Curoil no por a transferí/’draag af’ esaki tampoko na Belastingdienst.

Na 2021 Curoil a risibí un ‘aanslag’ di ANG 107 mion ku segun Belastingdienst Curoil ta debe. E montante aki despues a keda redusí na ANG 88 mion. Mirando ku nunka e montante aki no a keda hinka den e preis ku e konsumidó ta paga na pòmp, ainda ta den diskushon ku Gobièrnu si e montante aki tòch lo mester bai keda inkluí den preis si òf no. Den kaso ku Gobièrnu disidí ku lo mester kobra e impuesto aki, BTP lo mester inkluí esaki den preis di kombustibel i Curoil debidamente lo ‘draag af’ esaki na Gobièrnu. Curoil lo keda den deliberashon ku Ministerio di Finansa ku meta pa yega mas pronto ku ta posibel na un akuerdo ku ta satisfaktorio pa tur partido envolví, prinsipalmente e konsumidó.