AQUALECTRA KU TÈST PA KONTROLÁ SU RET DI KORIENTE

 

Willemstad 9 di februari 2024– Djasabra awor 10 di febrüari Aqualectra lo kondusí algun tèst den su ret di koriente. E tèstnan lo tuma lugá den un sirkuito kontrolá pa garantisá seguridat i stabilidat den nos infrastruktura di ret di koriente. Pa e proseso akí, nos ta konta ku sosten di un tim di eksperto ku lo asistí nos durante hinter e trayekto.

E chèns ta hopi chikí ku nos klientenan lo ripará ku e tèstnan ta tumando lugá. Apesar di esaki, Aqualectra ta prepará pa den kaso ku koriente mester kai afó tòg, rektifiká esaki mesora.

 

Aqualectra a hasi diferente análisis di su ret di koriente ku e meta pa stabilisá i drecha nan kalidat i pa den futuro Aqualectra por manehá pa evitá insidentenan manera koriente ku ta kai afó i blackout. E tèstnan di djasabra awor ta un di e akshonnan ku ta bin dilanti den un rapòrt ekstenso i profundo ku ta resultado di e análisis ku nos a laga hasi di nos ret.

 

Mesora Aqualectra por informá ku e tèst di djasabra awor no ta e úniko tèst. Pa e próksimo dos aña nos lo hasi diferente tèst similar, kombiná ku otro akshonnan stratégiko deliniá den nos mapa di direkshon pa logra e meta di tin un ret di koriente di kalidat haltu i stabil.

 

Nos a plania nos skema anual pa tèst ku nos klientenan na mente. Nos a skohe febrüari pa esaki pasobra e ta un luna ku uso di koriente ta abou. Sinembargo e aña akí nos ta konfrontando un bahada sin presedente di bientu den e luna di febrüari ku a resultá den un subida di 15% di uso di energia. Apesar di e kondishon di klima no usual ku nos ta konfrontando, Aqualectra ta ekipá pa garantisá kumpli ku demanda di energia i mantené konfiansa den nos servisio.