PA GABINETE WEVER-CROES, SIGURIDAD DI PAIS ARUBA TA NA PROME LUGAR
Prome Minister Evelyn Wever-Croes:
En conexion cu e tabletop “training”
PA GABINETE WEVER-CROES, SIGURIDAD DI PAIS ARUBA TA NA PROME LUGAR
“Pa Gobierno di Aruba ta importante pa tin mas siguridad, mas presencia di autoridad tur caminda, y si mester, tambe presencia di militar”
ORANJESTAD – Diahuebs mainta, na oficina di Crisis Management Office (CMO), a tuma luga un ‘tabletop training’ cu ta un ehercicio pa con atende, ora mester haci un peticion na militarnan Hulandes, na momento cu Aruba mester di ayudo den cualkier accion. Presente na e training aki, tabata Gobernador di Aruba SE Alfonso Boekhoudt, Prome Minister Evelyn Wever-Croes, Minister di Husticia Rocco Tjon, Comandante Walter Hansen di Corsou, Comandante Tim Van Wijk di Aruba,
y miembronan di KIA, Cuerpo Policial, y Ministerio Publico, pa hunto delibera con pa mehora e proceso di peticion.
Prome Minister a indica cu pa pidi asistencia na e defensa di Hulanda pa e presencia di militarnan na Aruba, tin varios procedura cu mester cumpli cu n’e, dependiendo e situacion. Importante ta pa esnan encarga cu esaki, sa exactamente kico mester haci na cada momento. P’esey ta importante pa pasa riba e proceduranan aki regularmente. Tin diferente momento cu por pidi asistencia, por pidi ‘zachte militaire bijstand’ cu ta den casonan di personanan desapareci, of ‘harde militaire bijstand’ cu ta den casonan severo, manera ora di un calamidad, pero pa cada un tin un procedura cu mester cumpli cu n’e.
“Na fin di dia, pa Gobierno di Aruba ta importante pa tin mas siguridad, mas presencia di autoridad tur caminda, y si mester, tambe presencia di militar. Ta asina so, nos por garantisa siguridad, y cu den caso di calamidad, tin suficiente hende cu por yuda pa Aruba sali afo mas lihe, y bay bek na normalidad.
E tabata un mainta exitoso y educacional, na unda esnan presente a haya e informacionnan necesario, y na mes momento fortifica e relacion cu ya caba ta hopi bon. Mi ta gradici tur esnan presente pa nan disponibilidad y esfuerso den mehora e procesonan aki, pa asina nos tin un isla mas sigur”, Prome Minister a expresa.
