Informashon eróneo duná enkuanto montante di supsidio otorgá dor di GMN.
Informashon eróneo duná enkuanto montante di supsidio otorgá dor di GMN.
Willemstad – Ku hopi asombro departamento di Servisio Veterinarioa (SV) di Ministerio di Salbridat, Medio Ambiente i Naturalesa (GMN) a tuma nota di un rueda di prensa urgente ku a keda duná djaweps 15 di febrüari dor di Stichting Dierenbescherming (SDB). Nan ta alegá ku GMN a kòrta den nan supsidio di 2024 i konsekuentemente esaki lo trese kuné ku nan lo bai tin problemanan finansiero i ku lo bai opstakulisá nan operashonnan.
SDB ningun momento no a drenta den kontakto ku Servisio Veterinario pa informá ku kisas por tabatin un posibel ekibokashon di e montante di supsidio ku a ser pagá den yanüari 2024, esaki mientrastantu ku e liñanan di komunikashon semper ta habrí i nan ta korto.
GMN ta rechasá enérgikamente ku a kòrta den supsidio di SDB i lo pasa pa duna informashon korekto.
SDB a haña na aña 2023 un supsidio di ± Ang. 63.000. Esaki ta un suma mensual di ± Ang. 5.250 ku a keda depositá riba kuenta bankario di SDB. Resientemente Parlamento di Kòrsou a aprobá presupuesto 2024 i pa SDB a aprobá un montante di Ang. 82.100. Esaki ta un subida di 30.3 % ku ta ekivalente na un montante adishonal di Ang. 19.100 kompará ku 2023.
GMN a depositá pa SDB dia 26 di yanüari 2024 un suma di Ang. 6.841,67 ku ta 1/12 parti di e supsidio aprobá dor di Parlamento di Kòrsou. E siguiente pago di Ang. 6.841,67 pa SDB, meskos ku tur e otro fundashonnan ku ta risibí suisidio di GMN, lo tuma lugá fin di febrüari 2024.
Ta bon pa informá ku e supsidio di ± Ang. 82.100 pa 2024 ta kai bou di esun regular kaminda GMN ta kumpra serka SDB e siguiente servisionan:
⁃ Asilo pa pushi i kachó;
⁃ Programa pa adoptá pushi i kachó;
⁃ Edukashon di komunidat;
⁃ Inspekshon di keho.
SDB ta haña e supsidio aki, pero no opstante ku masha difikultat nan ta entregá e dokumentonan finansiero pa responsabilisá uso di sènnan.
