Informashon eróneo tokante rekisitonan pa aplikashon di supsidio di GMN.
Informashon eróneo tokante rekisitonan pa aplikashon di supsidio di GMN.
Willemstad – Den reakshon riba e mensahe ku Stichting Dierenbescherming Curaçao (SDBC) a pone riba Facebook riba djabièrnè 16 di febrüari, departamento di Servisio Veterinaria (SV) di Ministerio di Salú, Medio Ambiente i Naturalesa (GMN) ke reakshoná di e siguiente forma.
No ta GMN su intenshon pa drenta den diskushon públiko ku ningun fundashon ku ta risibí supsidio di gobièrnu, pero GMN tin ku reakshoná i koregí informashon inkorekto ku a keda tres’e dilanti den publisidat. GMN ke informá riba e punto ku SDBC a trese dilanti relashoná ku e sistema di supsidio. Nan ta bisa ku GMN ta pidi diferente dokumento kada bes. E sistema di supsidio ta sigui e Dekreto di supsidio di 2016 (Landsbesluit subsidie van 2016, nummer 81). E ta indiká klaramente kiko organisashonnan, ku ta apliká pa un supsidio, mester kumpli kuné. Segun artíkulo 8 paragraf 3 di e lei aki, regulashon ministerial ku tin efekto general por stipulá reglanan mas detayá tokante e normanan di kalidat na vigor ku ta apliká na e eksaminashon di e oferta òf e petishon pa otorgamentu di un supsidio. Den artíkulo 9 paragraf 2 ta menshoná lo siguiente: Pa kada aktividat e rekisitonan di kontenido ta wòrdu dokumentá den un programa di rekisitonan. Den un regla ministerial ku tin efekto general por stipulá reglanan mas detayá tokante e kontenido di un programa di rekisitonan. Den artíkulo 14 paragraf 4 ta menshoná klaramente: E kuenta anual di e aña promé ku e aña di presentashon; si e no ta disponibel ainda, esaki por wòrdu entregá despues ku e keda aprobá, pero no mas lat ku 1 di mei di e aña di presentashon. Tambe ta menshoná den paragraf 6 ku e minister ku ta interesá por pidi si e deseá esaki, informashonnan adishonal, si esaki ta nesesario òf deseabel pa e evaluashon di e registrashon. Den artíkulo 24 di e desishon aki ta stipulá tambe ku si na momentu di entregá un petishon ta resultá ku e datonan rekerí no ta eksistí òf no ta kompleto, e sektor ku ta interesá ta duna e petishonario e oportunidat pa entregá e datonan ku ta falta. E petishonario mester entregá e datonan ku ta falta òf ku no ta kompleto na e minister ku ta enkargá den e kaso, esaki den un periodo di 14 dia for di e dia ku e petishonario a ser notifiká.
Esaki ta nifiká ku GMN tin derecho di pidi e organisashon ku ta hasi e petishon pa duna dokumentonan adishonal. Pero tambe e organisashon mester entregá e dokumentonan ku ta falta den un tempu determiná pa lei. Si e organisashon no ta kumpli ku esaki, e organisashon lo no wòrdu deklará atmisibel.
SDBC tabatin diferente oportunidat pa entregá tur e dokumentonan ku tabata falta i esaki a keda komuniká na nan via diferente liña di komunikashon. No entregá i/òf entregá lat ta den nan mes man. E Dekreto di supsidio di 2016 (Landbesluit subsidie van 2016, nummer 81) ta aksesibel pa tur hende via e wèpsait di gobièrnu. Un organisashon ku ta hasi un petishon pa un supsidio anual sigur mester ta na altura di esaki.
Un biaha mas GMN ke enfatisá ku pa SDBC por bin na remarke pa risibí e supsidio di ± Ang. 300.000 pa implementá e Lei di Bienestar di Animal, nan mester kumpli ku e kondishonnan ku ta stipulá den e Dekreto di supsidio. Ademas, nan mester tin un espasio konsiderabel pa por
kumpli ku e lugá di detenshon pa animalnan bandoná, ku ta stipulá den e Lei di Bienestar Animal. Na e momentu aki nan no por kumpli ku esaki. Si esaki no por ser kumplí dor di SDBC, minister di GMN lo buska un otro alternativa pa pèrkurá pa e lei aki keda implementá.
Pa loke ta trata e omishon atministrativo ku a surgi i ku a laga SDBC rekurí innesesariamente na un rueda di prensa relámpago esaki no ta representá un organisashon ku ta buska solushon i diálogo. Pasombra den dado kaso ku no a haña e “dossierhouder mes na e momento ei, por a aserká un otro funshonario di SV, den dado kaso ku esaki tampoko no tabata alkansabel por a aserká e SG di GMN i si ta nesesario e Minister di GMN. Si a hasi uso di e modelo di eskalashon aki lo por a evitá tur e polémika públiko innesesario aki.
Pa kualke pregunta por tuma kontakto ku dr. Cheryl van Ommen, hefe interino di VZ na +599 9 461-4000 òf via e-mail na info.uovz@gobiernu.cw i/òf drs. Sharlon Melfor, SG GMN na +5 99 9 560-8693 e-mail: sharlon.melfor@gobiernu.cw.
