Dos kolaboradó di Ministerio di GMN a huramentrá komo polis èkstra ordinario   

Dos kolaboradó di Ministerio di GMN a huramentrá komo polis èkstra ordinario   

Willemstad – Djamars último den oranan di mainta señor Jeandrick La Bast i señor Emanuel Legito di Ministerio di GMN a huramentá komo polis èkstra ordinario serka Minister di Hustisia señor Shalten Hato den presensia di Minister di Asuntunan General enkargá ku Medio Ambiente i Naturalesa señor Gilmar Pisas. Señora Raiza Martis a lesa e dekreto pa despues e dos personanan pasa un pa un dilanti Minister Hato pa huramentá.

E huramentashon a tuma lugá den sala di reunion di Ministerio di Hustisia. Durante su diskurso Minister Hato a gradisí señores La Bast i Legito pa aseptá e reto aki pa sigui protehá nos pais. Minister Pisas durante su diskurso kòrtiku a enfatisá ku awor ta bai duna hóbennan di Milisia e oportunidat pa inkorporá nan den e struktura di GMN pa yuda atendé infrakshonnan ambiental. Na final ámbos Minister a felisitá e dos personanan ku a huramentá i a deseá nan tur klasse di éksito den nan trabou.

Riba pòtrèt drpd: Minister di Hustisia señor Shalten Hato, señor Jeandrick La Bast, señor Emanuel Legito i Minister di Asuntunan General enkargá ku Medio Ambiente i Naturalesa señor Gilmar Pisas.