Promé Minister sr. Gilmar Pisas a risibí e embahador di Azerbeidzjan na Den Haag

Willemstad- Promé Minister sr. Gilmar Pisas a risibí e Embahador di Azerbeidzjan na Den Haag sr. Rahman Mustafayev dia 21 di febrüari 2024.

 

E bishita aki tabata unu di kortesia kaminda e Embahador di Azerbeidzjan a mustra entre otro interés pa kolaborá ku Kòrsou pa traha huntu den área di kultura i energía renudabel.

 

Den e enkuentro aki Embahador sr. Mustafayev a invitá Promé Minister sr. Pisas pa e partisipá, huntu ku Reino Hulandes, na COP 29 ku lo tuma lugá na novèmber 2024 na Bakhoe, Azerbeidzjan.

Promé Minister sr. Pisas a konfirmá ku e lo bai COP 29.

Na final di e kombersashon Promé Minister sr. Pisas a hasi entrega di un muestra di apresio pa e bishita na e Embahador.

 

Tambe Embahador sr. Mustafayev tabata tin un enkuentro ku Minister di Desaroyo Ekonómiko sr. Riusandro Cijntje i Minister di Edukashon, Siensia, Kultura i Deporte, sr. Sithree van Heyndoorn.

 

E kombersashonnan aki tur a kana den un bon esfera.