Banco di Caribe ta sostené proyekto di Stichting Kinderbescherming Curaçao:

Importansia di ‘tata’ den bida di su yu(nan)

 

WILLEMSTAD: Durante e lunanan di Banco di Caribe su selebrashon di 50 aniversario, klientenan por a sinti un esfera di hubileo mediante diferente kampaña, promoshon i gestonan ku a keda hasí na diferente instansia riba nos isla. Resientemente Banco di Caribe a hasi un otro donashon, e biaha aki na Stichting Kinderbescherming Curaçao (SKBC).

 

Direktor di Banco di Caribe Sr. Eduardo (Dito) A. de Kort a hasi un bishita personal na SKBC pa risibí un presentashon i splikashon di e proyekto ‘Tata’.  “Muchanan i hóbennan di Kòrsou semper tin un lugá spesial pa nos na Banco di Caribe; nan ta e futuro generashon. Komo tal, mester pèrkurá pa nan risibí un bon formashon. Ademas, ta importante pa nan risibí un espasio sigur pa desaroyá i realisá nan máksimo potensial. Nos ta aportá na e formashon aki mediante diferente instansia non-profit.”

 

Proyekto dediká na e hende hòmber ku a bira ‘tata’

Stichting Kinderbescherming Curaçao (SKBC) pa hopi aña ta kontribuí na protekshon di derecho i guia di hóben i mucha den nos komunidat.  SKBC ta usa diferente kanal, manera charla, kampaña i nan liña di telefòn 918, pa hóbennan por drenta den kontakto i kompartí òf deshogá.  Despues di a trata diferente situashon den kasnan di famia, SKBC a tuma nota ku tin nesesidat pa guia mayornan tambe. P’e motibu aki, nan a introdusí e proyekto ‘Tata’. E proyekto ta enfoká riba konsientisashon di tatanan i e importansia di nan presensia den bida di nan yu(nan). Pa realisá esaki, tatanan mester ta konsiente di nan derecho- i debernan. Durante un bishita na SKBC, e tim a duna splikashon di efektonan positivo ku un bon relashon entre mayornan tin riba e mucha su desaroyo i futuro.

 

Pa por alkansá nan meta, SKBC ta bishitá diferente kompania di manera ku e empleado maskulino por presensiá diferente tayer i interkambiá eksperensia ku otro. Dia 21 di mart 2024, SKBC lo ofresé e promé tayer na sentro di bario di Buena Vista di 19:00 or pa 20:00 or. Tatanan ku ta interesá, por partisipá riba e fecha aki òf sigui e anunsionan di SKBC pa keda na altura di e tayernan den e trayekto aki. Banco di Caribe ta aploudí SKBC su esfuersonan. Danki na dedikashon di tur boluntario, SKBC a logra yuda vários mucha i nan famia. Banco di Caribe ta deseá SKBC hopi éksito i ta enkurashá henter e tim pa sigui ku e bon trabou i hasi un diferensia den bida di nos muchanan.