Nos ta den temporada ku Sargassum ta afektá sierto parti di nos kosta  

Nos ta den temporada ku Sargassum ta afektá sierto parti di nos kosta    

Willemstad – Kòrsou atrobe ta den e temporada ku Sargassum ta drif yega nos kosta. For di dos siman pasá observadónan ku tabata vigilá e situashon di derame di petroli a señalá manchanan di Sargassum biniendo den nos direkshon. Entre tantu áreanan ku semper ta keda afektá manera bokanan den área di Ascencion i Sint Joris ya tin Sargassum. Sint Joris no tin masha Sargassum ainda pero bokanan na Ascencion si ya ta basta afektá.

E departamentu di Naturalesa i Medio Ambiente lo sigui monitoriá e situashon e dianan aki pa despues di inventarisashon plania un momento ku ta mas efikas i efisiente pa atendé ku e Sargassum. Sargassum ta un tipo di alga di Mar Atlántiko ku semper ta drif liber riba laman. E por forma peliger pa por ehèmpel turtuganan momentu ku e Sargassum drenta e bokanan i yena esaki di tal manera ku e ta stroba turtuganan bou di awa pa bini riba pa hala rosea i asina nan ta muri. Observadónan ku tin bista riba laman lo keda monitoriá e situashon i ta keda mantené Ministerio di GMN na altura di e desaroyonan. Riba potrètnan por mira e situashon na Ascencion.